ඒකාබද්ධ විපක්ෂයේ පාගමන මාවනැල්ල නගර සීමාවේ ප්‍රධාන හා අතුරු මාර්ගවලට ඇතුළුවීම වලක්වමින් මාවනැල්ල මහේස්ත්‍රාත් අධිකරණය   මහින්ද රාජපක්ෂ මහතා ඇතුළු දස දෙනකුට තහනම් නියෝගයක් නිකුත් කෙළ්ය.

එක්සත් ජාතික පක්ෂය මාවනැල්ලේ සංවිධානය කර තිබූ පක්ෂ ප්‍රවර්ධන රැස්වීම් ද මාවනැල්ල නගර සීමාව තුළ තහනම් කරමින් එම පක්ෂයේ නව දෙනකුට ද තහනම් නියෝග නිකුත් කැරිණි.

පොලිස් මාධ්‍ය කොට්ඨාසයේ සහ   විනය හා කල්කිරිය කොට්ඨාසයේ අධ්‍යක්ෂ පොලිස් අධිකාරී නීතීඥ රුවන් ගුණසේකර මහතා කළ කරුණු දැක්වීමක් අනුව අධිකරණය එම නියෝග නිකුත් කළේය.

එජාපය පක්ෂ ප්‍රවර්ධන වැඩසටහනක් මාවනැල්ලේ පවත්වන බවත්, පොදු විපක්ෂය ද මාවනැල්ල හරහා බාගමනක් යන බවත් මේ නිසා ගැටුම්කාරී තත්ත්වයක් ඇති වී මහජන සාමායට බාධා විය හැකි බවත් පොලිසිය අධිකරණයට දැන්වීය.

මාවනැල්ලේ පටු මාර්ග ඔස්සේ පාගමන් යද්දි මහජනතාවට පීඩාවක් ඇති විය හැකි බව ද, ජනපති හා අගමැති එදිනම සංවර්ධන ව්‍යාපෘති නිරීක්ෂණය කිරීමට මාවනැල්ලට ඒමට නියමිත බව ද පොලිසිය කීවේය.