විපක්ෂයේ පොදු අපේක්ෂක මෛත්‍රීපාල සිරිසේන මහතාගේ සහභාගිත්වයෙන් අද (18)  බේරුවල දී පැවැත්වීමට නියමිත ජන රැළියට අලුත්ගම මහජන ක්‍රීඩාංගනය ලබාදීම බේරුවල ප්‍රාදේශීය සභාව විසින් ප්‍රතික්ෂේප කර ඇතැයි කැෆේ සංවිධානය කියයි. 

පසුගිය කාලයේ පැවැති ජාතික මැතිවරණ වල දී රැස්වීමේ පැවැත්වූයේ මෙම ක්‍රීඩා පිටියේ බවත්, එවැනි  ආරක්ෂක ස්ථාන රැස්වීම් පැවැත්වීම සදහා ලබා නොදීම නිසා ජනාධිපතිවරණයට ඉදිරිපත් වන අපේක්ෂකයින්ගේ ද, ජාතික දේශපාලන නායකත්වයේ ද ජීවිත අවදානමේ හෙළීමක් බවත් කැෆේ සංවිධානය පවසයි.

සිරිසේන මහතාට සහාය පළ කරන අත් පත්‍රිකා මහනුවර නගරයේ බෙදමින් සිටි බව කියන පේරාදෙණිය සරසවියේ ආචාර්යවරුන් දෙදෙනකු සහ ගුරු සංගම් නියෝජිතවරියකට සන්ධානයේ දේශපාලනඥයකුගේ ආරක්ෂකයන් පිරිසක් පහර දී ඇතැයි ද, ඔවුන් රැගෙන ගොස් කාමරයක සිර කර තබා ඇතැයි ද, ගුරු සංගම් නියෝජිතවරියගේ අත තුවාල වී තිබුනේ යැයි ද, සිද්ධිය සම්බන්ධයෙන් මහනුවර පොලිසියට පැමිණිලි කර ඇතැයි ද කැෆේ සංවිධානය සඳහන් කරයි.

මේ වන විට මැතිවරණ ප්‍රචණ්ඩ ක්‍රියා සහ මැතිවරණ නීති උල්ලංඝණය කිරීම සම්බන්ධ පැමිණිලි 331ක් කැෆේ සංවිධානයට ලැබී ඇත.