(සුජිත් හේවාජුලිගේ සහ  අංජුල මහික වීරරත්න)

පාර්ලිමේන්තුවේ ක්‍රියාත්මකවන  මුදල් කාරක සභාව, පොදු ව්‍යාපාර පිළිබඳ කාරක සභාව (කෝප්  කමිටුව), ගිණුම් කාරක සභාව වැනි විශේෂ කාරක සභා සඳහා විශේෂඥයන් සහ පර්යේෂකයන්ගේ සහාය ලබා ගැනීමට පාර්ලිමේන්තුවේ සම්බන්ධීකරණ කාරක සභාවේ දැඩි අවධානය යොමුවූ බව පාර්ලිමේන්තුවේ මහ ලේකම් ධම්මික දසනායක මහතා පැවැසීය .

පාර්ලිමේන්තුවේ සම්බන්ධීකරණ කාරක සභාව  කතානායක මහින්ද යාපා අබේවර්ධන මහතාගේ ප්‍රධානත්වයෙන් පාර්ලිමේන්තු සංකීර්ණයේදී පසුගියදා රැස් විය.

මෙම කාරක සභාවට සහභාගිවූ සභානායක සහ විදේශ කටයුතු පිළිබඳ අමාත්‍ය දිනේෂ් ගුණවර්ධන, මුදල් කාරක සභාවේ සභාපති ,මන්ත්‍රී අනුර ප්‍රියදර්ශන යාපා මහතා සහ වෙළඳ අමාත්‍ය බන්දුල ගුණවර්ධන යන මහත්වරු මෙම කමිටු සඳහා  ආර්ථිකය ඇතුළු විවිධ විෂය ක්ෂේත්‍රයන්හි ප්‍රවීණයන්ගේ දායකත්වය ලබා ගැනීමේ අවශ්‍යතාව පෙන්වා දුන්හ.

මුදල් කාරක සභාව වැනි කාරක සභාවන්ට අයවැය වකවානුවේදී දිනපතා රැස්වීමට සිදුවීම සහ   ආර්ථික කටයුතු හා මූල්‍ය අණ පනත් සංවාදයට ලක් කර ඒවාට අනුමැතිය ලබා දීමට  සිදුවන නිසා විශේෂඥයන්ගේ මෙන්ම පර්යේෂකයන්ගේද  සහය දැඩි ලෙස අවශ්‍ය වන බවත් අනුර ප්‍රියදර්ශන යාපා මහතා ‍මෙහිදී පෙන්වා දුන්නේය.

මේ අතර  පාර්ලිමේන්තු උපදේශක කාරක සභා රැස්වීම් අමාත්‍යංශවලම පැවැත්වීමට ඇති හැකියාව සොයා බැලිය යුතු බවත් ඒ හරහා වැඩි නිලධාරීන් පිරිසකගේ දායකත්වය ලබාගැනීමට හැකිවන බවත් දිනේෂ් ගුණවර්ධන මහතා මෙහිදී ප්‍රකාශ කළේය .ඒ සඳහා ස්ථාවර නියෝග සංශෝධනය කළ යුතු බවද ඔහු පෙන්වා දුන්නේය.

මෙයට අමතරව මහජන පෙත්සම් කාරක සභාව වැනි මහජනතාව සෘජුව සහභාගීවන කාරක සභාවන්ද පාර්ලිමේන්තුවෙන් පිටත ස්ථානවලදී  පැවැත්වීමට ඇති හැකියාව පිළිබඳවද  මෙහිදී අවධානය යොමු වූ බව පාර්ලිමේන්තු මහ ලේකම්වරයා පැවසීය .
ඒසඳහා පාර්ලිමේන්තුවෙන් පිටත රජයේ ගොඩනැගිල්ලක් යොදා ගැනීම සඳහා ස්ථානයක් සොයා බැලිය යුතු බවත් පිටත ස්ථානවල පැවැත්වීමෙන්  කාරක සභාවලට මහජන සහභාගීත්වය වැඩි කරගත හැකි වනු ඇති බවත් සමාජික මන්ත්‍රීවරු මෙහිදී පෙන්වා දුන්හ.

පාර්ලිමේන්තු විවාදයන් පැවැත්වෙන අවස්ථාවලදී මන්ත්‍රීවරුන්ට අදහස් දැක්වීමට අවශ්‍ය වන කරුණු ලබා ගැනීමටද  විශේෂඥයන්ගේ සහාය වැදගත් වන බව පරිසර අමාත්‍ය මහින්ද අමරවීර මහතා පැවසීය

බොහෝ කාරක සභා රැස්වීම්වලට මේ දිනවල ඔන්ලයින් (on line) තාක්ෂණය ඔස්සේ නිලධාරීන් සම්බන්ධ කරගන්නා බවත් වෙබ් අඩවිය යාවත්කාලීන කර කාරක සභාවල තොරතුරු මහජනතාවට ලබාදීමට කටයුතු කටයුතු යොදා තිබෙන බවත් ධම්මික දසනායක මහතා පැවසීය.

මේ අතර උපදේශක කාරක සභා රැස්වීම් අදාළ අමාත්‍යාංශ පරිශ්‍රයන්හි පැවැත්වීමෙන්  නිලධාරීන් වැඩි පිරිසකගේ දායකත්වය ඊට ලබා ගැනීමට හැකි වන බැවින් ස්ථාවර නියෝග අනුව එසේ කළ හැකි දැයි සොයා බලන ලෙස දිනේෂ් ගුණවර්ධන අමාත්‍යවරයා මෙහිදී කතානායකවරයාගෙන් ඉල්ලීමක්  කළේය.