(විමුක්ති එස් රුද්‍රිගු)

ශ්‍රී ලංකා මහ බැංකුව ප්‍රතිපත්ති පොලී අනුපාතික ඉහළ දැමීමට ගත් තීරණය පිළිබඳ ජාත්‍යන්තර මූල්‍ය අරමුදලේ ප්‍රසාදය හිමිව තිබේ.ශ්‍රී ලංකා මහ බැංකුව ගත් මෙම තීරණය උද්ධමනය ස්ථිරවම සහ ඉතාමත් ඉක්මණින් පහළ දමමින් තනි ඉලක්කමක් කරා ගෙන ඒමට ඇති කැපවීම පෙන්නුම් කරන බව ජාත්‍යන්තර මූල්‍ය අරමුදල පෙන්වා දී තිබේ.

ශ්‍රී ලංකා මහ බැංකුව ප්‍රතිපත්ති පොලි අනුපාතික ඉහළ දැමීමට ගත් තීරණය, උද්ධමන ඉලක්ක සපුරා ගැනීම සඳහා වන පොදු රාමුවේ අරමුණු වලට අනුකූල මෙන්ම සුදුසු තීරණයක් බව ජාත්‍යන්තර මූල්‍ය අරමුදලේ ශ්‍රී ලංකාවේ ජ්‍යෙෂ්ඨ මෙහෙයුම් ප්‍රධානී පීටර් බෘවර් සහ ජාත්‍යන්තර මූල්‍ය අරමුදලේ මෙරට මෙහෙයුම් ප්‍රධානී මසහිරෝ නොසාකි යන මහත්වරුන් ප්‍රකාශයක් නිකුත් කරමින් පෙන්වා දී ඇත.

ශ්‍රී ලංකා මහ බැංකුවේ මෙම තීරණය උද්ධමන ඉලක්ක සපුරා ගැනීමට ඇති කැපවීම පිළිඹිබු කරන බවත් මෙම තීරණය ජාත්‍යන්තර මූල්‍ය අරමුදලේ විස්තීරණ අරමුදල් පහසුකම් වැඩසටහනේ උද්ධමනය පහළ දැමීමේ උපාය මාර්ගයේ වැදගත් කොටසක් බවත් එම ප්‍රකාශයේ දැක්වේ.

ශ්‍රී ලංකාවේ උද්ධමනය පහළ යමින් තිබුණත් එය තවමත් ඉහළ මට්ටමක පවතින බවත් එය දුප්පත් ජනතාවට දැඩි පීඩනයක් එල්ල කරන බවත් ජාත්‍යන්තර මූල්‍ය අරමුදල ප්‍රකාශ කර ඇත.