සිංහල අවුරුදුදාට පසුවදාට කොළඹට ගොඩබැසීමට නියමිත බ්‍රිතාන්‍ය ගුවන් සේවයේ සමාරම්භක ගුවන් යානාවේ නියමුවා ශ්‍රී ලාංකිකයකු බව වාර්තාවෙයි.  ලොව විශාලතම ගුවන් සමාගමක් වන බ්‍රිතාන්‍ය ගුවන් සේවයේ නියමු කපිතාන් කිරන්මැදිවක මේ නියමුවායි. අප්‍රේල් 15වැනිදාට කොළඹට පැමිණෙන එම ගුවන් යානයේ බ්‍රිතාන්‍ය ගුවන් සේවයේ සභාපති කීත් විලියම්ස් සමඟ එම සමාගමේ විධායක නිලධරයන් පස් දෙනකු ද බ්‍රිතාන්‍ය සංචාරක මාධ්‍යවේදීන් 30 දෙනෙක් ද  එතියි කියති. බ්‍රිතාන්‍ය මාධ්‍යවේදීන් හට  සතියක සංචාරයක් ද ශ්‍රී  ලංකාවෙන් සංවිධානය කරයි. 

එම ගුවන් යානය ලංකාවට එන්නේ දස වසරකට පසුය.

ලොව ප්‍රධාන පෙළේ  ගුවන් සමාගමක සභාපති මේ චාරිකාවට එක්වීමෙන් ශ්‍රී ලංකාවට පියාසර කිරීම සඳහා  අවස්ථාවක් ලැබීම බ්‍රිතාන්‍ය ගුවන් සමාගම කොතරම් වැදගත් ලෙස සලකනු ලබනවාදැයි පෙනී යන බව මේ පිළිබඳව පළවී ඇති බ්‍රිතාන්‍ය ජනමාධ්‍ය වාර්තා කියයි.

බ්‍රිතාන්‍ය ගුවන් සේවය මෙලෙසින් ශ්‍රී ලංකාවට යළිත් වරක්  සිය ගුවන් ගමන් ආරම්භ කරනුයේ දිගු නිහැඬියාවකින් පසුවය. පසුගිය කාලයේ ශ්‍රී ලංකාවේ පැවතී යුදමය වාතාවරණය නිසා ලන්ඩන් නුවර සිට කොළඹ දක්වා කලින් පවත්වාගෙන ගිය ගුවන්ගමන් සියල්ල නවතාදැමීමට බ්‍රිතාන්‍ය  ගුවන් සේවයට සිදුවිය. අලුතින් ආරම්භ කෙරෙන කාල සටහනට අනුව සතියකට තුන්දිනක් මෙම ගුවන් ගමන් වාර ලන්ඩන් නුවර ගැට්වික් ගුවන් තොටුපළේසිට මාලදිවයිනේ මාලේ නුවර හරහා කොළඹට ගමන්කරනු ඇත. 

මේ සඳහා නවීන  බෝයින් 777 වර්ගයේ අධිසුකොපභෝගී ගුවන් යානාවක් යොදා ගැනේ. දුර ගමන් සඳහා නිමවා ඇති එම යානයේ පළමු පන්තියේ මගීන් සඳහා සකස්කර ඇති ආසනය සැප පහසු අන්දමට නිදාගත හැකි ඇඳක් ලෙසද සකස්කරගැනීමේ හැකියාවෙන් යුක්තය. 

ශ්‍රී ලංකාවට පැමිණෙන විදේශ සංචාරකයන් අතරින් බ්‍රිතාන්‍ය  දෙවැනි තැනට පත්වී සිටී. මේ නිසා එවන් වැදගත් වෙළඳ පොළකට  නැවතත් ඇතුළුවී ගුවන් මගීන් සඳහාඉහලම පහසුකම් සමඟ තරඟකාරී සැපයුමක් ලබාදීම තමන්ගේ අභිප්‍රාය බව බ්‍රිතාන්‍ය ගුවන් සේවයේ කළමණාකාර අධ්‍යාක්ෂ සිලා මයිසෙයි පවසන්නීය. 

ශ්‍රී ලංකාවෙන් අලුතෙන් විවෘත කෙරෙන මත්තල ගුවන් තොටුපළට තම ගුවන් යානා ගෙනයන්නේදැයි ඇසූ ප්‍රශ්නයකට ඇය කියා ඇත්තේ ඒ ගැන තවමත් තීරණයක් ගත නොහැකි බවයි. මත්තල ගුවන් තොටුපළ පූර්ණ වශයෙන් ක්‍රියාත්මක වූ පසුව මේ ගැන සළකා බැලිය හැකිබව ඇය කියන්නීය.