(සුජිත් හේවාජුලිගේ සහ අංජුල මහික වීරරත්න)

මධ්‍යම අධිවේගී මාර්ගයේ පසුගිය යහපාලන රජය සමයේදී සිදුවී ඇති දූෂණ වංචා සෙවීමට කමිටුවක් පත් කරන බව මහා මාර්ග අමාත්‍ය ජොන්ස්ටන් ප්‍රනාන්දු මහතා පාර්ලිමේන්තුවේදී අද (6) පැවසීය.

එම මාර්ගයේ ඉදිකිරීම් කටයුතු ඇතැම් ඇමතිවරුන්ගේ සමාගම්වලට බාරදී ඒවා ප්‍රමාද කළ බවද හෙතෙම සඳහන් කළේය.

ඇමතිවරයා මෙසේ පැවසුවේ කුරුණෑගල දිස්ත්‍රික් මන්ත්‍රී ශාන්ත බණ්ඩාර මහතා ඇසූ ප්‍රශ්නයකට පිළිතුරු දෙමිනි.

එදා මහින්ද රාජපක්ෂ ජනාධිපතිවරයා රුපියල් කෝටි 6600 ක වියදමින් ම0තීරු හයක් සහිතව ඉදි කිරීමට ගිය එම මාර්ගය යහපාලන රජය පැමිණීමෙන් පසුව මංතීරු දෙකක් අඩු කර එම මුදලටම ලබාදුන් බවද ඔහු ප්‍රකාශ කළේය.

මධ්‍යම අධිවේගී මාර්ගය ඉතාම ඉක්මනින් සාදා අවසන් කිරීමට බලාපොරොත්තු වන බවද ඇමතිවරයා කීවේය.

අධිවේගී මාර්ගයේ සඳහා අත්පත් කරගත් අලව්ව ප්‍රාදේශීය ලේකම් කොට්ටාශයේ ඉඩම් සඳහා රුපියල් කෝටි තිස් හයක පමණ වන්දි මුදලක් ගෙවා ඇති බවත් තවත් කැබලි හයක් සදහා වන්දි ගෙවීමට ඇති බවත් හෙතෙම ප්‍රකාශ කළේය.

නාරම්මල ප්‍රාදේශීය ලේකම් කොට්ටාසයෙන් අත්පත් කරගත් දේපළ සඳහා රුපියල් කෝටි 120කට වැඩි වන්දි මුදලක් ගෙවා ඇති බවත් තවත් කැබලි 13 කට ගෙවීමට නියමිත බවත් ජොන්ස්ටන් ප්‍රනාන්දු මහතා පැවසුවේය.

ඉදිකිරීම් කටයුතු සිදු කිරීමේදී අක්‍රමිකතාවයන් සිදුවී ඇති නම් ඒවා පිළිබඳ සොයා බලා හැකි ඉක්මනින් පියවර ගන්නා බවද ඔහු සඳහන් කළේය.