ප්‍රතිසන්ධානය, වගවීම සහ කල්පවත්නා සාමය ඇතිකිරීම සඳහා ශ්‍රී ලංකාව ඔවුන්ගේම වැඩපිළිවෙළක් ක්‍රියාත්මක කරමින් සිටින බව එක්සත් ජාතීන්ගේ මානව හිමිකම් පිළිබඳ මහකොමසාරිස් සෙයිද් රාද් අල් හුසේන් කුමරු පවසයි.

ශ්‍රී ලංකා රජය විසින් මේ වන විටත් වැදගත් පියවර රැසක් ගෙන ඇති බව ඔහු පෙන්වා දී ඇත.

ජිනීවා නුවර එක්සත් ජාතීන්ගේ මානව හිමිකම් කවුන්සිලයේ 31 වැනි සැසිවාරයට සිය වාර්ෂික වාර්තාව ඉදිරිපත් කරමින් සෙයිද් රාද් අල් හුසේන් කුමරු මේ බව සඳහන් කර ඇතැයි ජිනීවා තානාපති ආරංචි මාර්ග පවසයි.

විශේෂයෙන් ආණ්ඩුක්‍රම ව්‍යවස්ථා ප්‍රතිසංස්කරණ, ස්වාධීන ආයතන ස්ථාපිත කිරීම, නිදහස් අදහස් ප්‍රකාශ කිරීමට සහ විවාද සඳහා සුදුසු පරිසරය නිර්මාණය කිරීම වැනි කරුණු ශ්‍රී ලංකා රජය විසින් ගෙන ඇති වැදගත් පියවර ලෙස හැඳින්විය හැකි බව මහකොමසාරිස්එහිදී පවසා ඇත.

ජාතික ගීය දෙමළ භාෂාවෙන් ගායනා කිරීම ප්‍රතිසන්ධානය වෙනුවෙන් ගත් වැදගත් පියවරක් ලෙස ද මහකොමසාරිස්සඳහන් කර තිබේ.

කෙසේවෙතත් රැඳවුම් භාරයේ පසුවන පුද්ගලයින්ට අදාළ නඩු කඩිනමින් විසඳීම, අතුරුදන්වූවන්ගේ ගැටලු විසඳීම, ආරක්ෂක අංශ භාරයේ පවතින ඉඩම් නිදහස් කිරීම යන කරුණු ද කඩිනමින් ඉටු කළ යුතුව පවතින බව සෙයිද් රාද් අල් හුසේන් කුමරු කියා සිටියේය.

එමෙන්ම මානව හිමිකම් කවුන්සිලයේ යෝජනා සම්පුර්ණයෙන් ක්‍රියාත්මක කිරීමට අදාළව ශ්‍රී ලංකාවේ නීති ක්‍රියාවලියේ වෙනසක් සිදු කිරීමට නියමිත බැවින්  ඉදිරි මාස කිහිපයක කාලය ශ්‍රී ලංකාවට වැදගත් කාල සීමාවක් වනු ඇති බවත්, ශ්‍රී ලංකාවේ ප්‍රගතිය පිළිබඳ වාර්තාවක් ලබන ජුනි මාසයේ පැවැත්වෙන සැසිවාරයට ඉදිරිපත් කරන බවත්, මානව හිමිකම් මහකොමසාරිස්වරයා කවුන්සිල සැසිවාරයේ දී ප්‍රකාශ කර තිබේ.