නිරෝෂා කොහොමද අද දවසේ කටයුතු?
ගොඩාක් හොඳ ප‍්‍රතිචාර අතරේ ජීවිතය සතුටින් ගෙවී යනවා.

රඟපෑමට අහම්බෙන් ආ චරිතයක් වග ඔබ සඳහන් කළා. අහම්බයකින් ආ රඟපෑම ඔබට දැනෙන්නෙ කොහොමද?
රඟපෑමට අහම්බයකින් ආවත් කැමරාව මට අමුතු දෙයක් වුණේ නැහැ. අවුරුදු හයේ විතර ඉඳලාම මම නර්තන විෂයෙහි යෙදී සිටිනවා. මේ නිසා එදා ඉඳලාම රූපවාහිනී වැඩසටහන්වලට දායක වෙන්න ලැබුණා. මේ නිසා කැමරාව නුහුරු දෙයක් වුණේ නැහැ. මුලින්ම ටෙලි නාට්‍යයක රඟපාන්න ආවාම, ශාන්ත සොයිසා මහතා ගොඩාක් දේ කියා දුන්නා. ඉන්පසු දිගින් දිගටම දුර්වල තැන් හදාගෙන, අත්දැකීම් ලබමින් ඉදිරියට යන ගමනක් කිව්වොත් හරි.

රඟපෑම සහ නැටුම ඔබට දැනෙන්නෙ මොන විදියටද?
ඇත්තටම නර්තන ශිල්පිනියක වීම ගැන නම් මට ගොඩාක් සතුටුයි. එය රංගන වෘත්තියට ඉතා ප‍්‍රයෝජනවත් අංශයක්. මේ දෙකම කරන්න ලැබීම භාග්‍යයක්. මේ අංශ දෙකෙහි නිරත වීම වෙනුවෙන් සැමියාගෙන් ලැබෙන සහයෝගයත් අගය කරන්නම  ඕනෑ.

අද නැටුම් කණ්ඩායම් බොහෝමයි, ඒ අතර ඔබගෙ කණ්ඩායමේ වෙනස කුමක්ද?
මගේ නැටුම් ගුරුවරිය වන්නේ ප‍්‍රදීපා ආරියවංශ මහත්මියයි. එතුමිය යටතේ නර්තනයෙහි බොහෝ දේ ප‍්‍රගුණ කළා. ඉන්පසුව තමයි මගේම නර්තන කණ්ඩායමක් පිහිටුවා ගත්තේ ”යූ” නමින්. හැබැයි ටීචර් මට දුන් උපදෙස් වගේම මගේ අරමුණ වන්නෙ එළිමහන් ප‍්‍රසංගවලට දායක වන්නෙ නැහැ කියන එකයි.

ඊට හේතුව?
අද තියෙන සමහර වෘත්තීය නොවන නර්තන කණ්ඩායම් නිසා, යම්තාක් දුරට මේ අංශය හෑල්ලූවට ලක්වෙලා. සමහර දෙමාපියන් දියණියන් නර්තනයට යොමු කරවන්න වගේම, සංදර්ශනවලට යවන්න එච්චර කැමැත්තක් නැති තරම්. කොහොම වුනත්, මෙහි හරය ගුණය රැකගෙන ගෘහස්ථ නර්තන කලාවක නිරතවීම අපේ අරමුණයි. දැනට අප මංගල්‍ය උත්සව සහ විශේෂිත අවස්ථාවලට පමණක් දායක වෙනවා.

නර්තනයෙන් විය යුත්තෙ, ඒ විදියට නර්තනය ඉදිරිපත් කිරීම විතරද?
නැටුමකින් ප‍්‍රධානව මිනිස්සු සතුටට පත්කරවීම තමයි සිදුවන්නෙ. එනිසා අපේ ආරෙට ඒ සතුට නර්තනය වෙතින් ලබාදීම අරමුණයි.

ඇයි එතැනින් එහාට ගිය වෙනස් දෙයක් කරන්න බැරි?
අපට අපේ කණ්ඩායම ඒ වෙනුවෙන් තව පළපුරුද්ද ලබාගත යුතුයි. ඉන්පසුව අපේම නිර්මාණ සහිත ප‍්‍රසංගයක් කරාවි.

අද විකාශය වන ටෙලි නාට්‍ය ඔක්කෝම මිනිස්සු අතරට යනවා කියලා හිතනවද?
අපේ සමාජයේ මිනිස්සු රැකියාවල නිරතවෙලා ගෙවල්වලට එන්නෙ සැහැල්ලූව ලබන්නයි. මම හිතනවා විකාශය වන ටෙලි නාට්‍ය වෙතින් ඒ වින්දනය සැහැල්ලූව ලැබෙනවා.

මේ විදියට ඔබ දායකත්වය ලබාදෙන්නෙ ටෙලිනාට්‍යයට විතරද?
පසුගිය කාලයේදී වේදිකා නාට්‍යවල රඟපෑවා. රාත‍්‍රී භෝජනය (බන්ධුල විතානගේ*, නිකරුනේ ගැවසීම තහනම් (ගාමිණි එස් බණ්ඩාර) කළ නාට්‍යවල රඟපෑවා.

ඔබ වඩා ප‍්‍රකට මෙගා නාට්‍යවල රඟපාන ශිල්පිණියක ලෙසයි. ඒ කාර්ය බහුලත්වය ගැන මොනවද කියන්න පුළුවන්? ජීවිතය ගෙවෙන්නෙ මෙගාවලට වීම කොහොමද හිතන්නෙ?
අපට බොහෝ විට ලැබෙන්නෙ ඒ නාට්‍යය. මම ක්ෂේත‍්‍රයට ආවෙත්, එන්න ලැබුණෙත් ඒ නාට්‍ය නිසයි. අවිවේකී තමයි, ඒත් ඒවා වෙතින් හෝ රංගනය ගැන පළපුරුද්ද ලබමින් යන ගමන හොඳයි.

මේ කාර්ය බහුල වීම නිසා ගෙදරට යුතුකම් ඉටුකරන්න පුළුවන්ද?
විවාහ වූ පසු සැමියා අපේ දියුණුව පතා විදේශගත වුණා. අපි දෙන්නා අවබෝධයෙන් දියුණුව වෙනුවෙන් කටයුතු කරනවා. ඉන්පසු ගෘහණියක, බිරිඳක, මවක ලෙස මගෙන් ඉටුවිය යුතු කාර්යය සඳහා ජීවිතය කැපකිරීමට සූදානම්.

ඔබ මොනවගේද කියලා ඇහුවොත්?
මම හරිම සරල, ඒ වගේම ටිකක් කටකාර, දුක ඉක්මණට දැනෙන විදියෙ චරිතයක්.

ජීවිතයේ තේමාව?
මොන ප‍්‍රශ්න ආවත් මොන කරදර බාධක කම්කටොළු ඇතිවුණත්, ඒ සියල්ල හිනාවෙලා බාරගන්න පුළුවන් නම්? ජීවිතය ලස්සන කර ගන්න පුළුවනි.