(ඇල්ල ප්‍රසාද් රුක්මල් )

උඩරට දුම්රිය මාර්ගයේ හීල්ඔය කිණිගම දුම්රිය ස්ථාන අතර දුම්රිය මාර්ගයට අද (26) උදෑසන විශාල මාර ගසක් කඩා වැටීමෙන් බදුල්ල කොළඹ කොටුව අතර දුම්රිය ධාවනයට බාධා සිදුව ඇතැයි නාවලපිටිය දුම්රිය පාලක මැදිරිය පවසයි.

පවතින දැඩි සුලං සමග මෙසේ දුම්රිය මාර්ගයට මාර ගස කඩා වැටී දුම්රිය මාර්ගය අවහිර වී තිබේ .

මේ අතර අද (26) අලුයම බදුල්ල සිට කොළඹ කොටුව බලා ධාවනය වෙමින් තිබූ අංක 1016 දරන උඩරට මැණිකේ දුම්රියේ රියදුරු දුම්රිය මාර්ගයට කඩා වැටී තිබූ විශාල ගස දුරදීම දැක දුම්රිය නවතා ගැනීම නිසාවෙන් සිදුවීමට ගිය අනතුරක් වළකා ගෙන ඇතැයි එම දුම්රියේ ගමන් ගත් මගීන් පැවසූහ .

කොළඹ කොටුව සිට බදුල්ල බලා ධාවනය වෙමින් තිබූ අංක 1045 දරණ රාත්‍රි තැපැල් දුම්රිය දැනට බණ්ඩාරවෙල දුම්රිය ස්ථානයේ නවතා තබා ඇති අතර , දුම්රිය මාර්ගය ට කඩා වැටී ඇති විශාල ගස කපා ඉවත් කිරීමට කටයුතු කරන බවද දුම්රිය පාලක මැදිරිය වැඩිදුරටත් සදහන් කළේය .

​