ශ්‍රී ලංකාවෙන් අපනයනය කරන ධීවර නිෂ්පාදන සඳහා යුරෝපා සංගමය විසින් පනවන ලද තහනම ඉවත් කර ගැනිම වෙනුවෙන්  ශ්‍රී ලංකා රජය  අනුගමනය කරන ක‍්‍රියාමාර්ග වල ප‍්‍රගතිය පිළිබඳව යුරෝපා සංගමය ප‍්‍රශංසාව පළ කරයි.

ඉන්දීය සාගර ටූනා කොමිසමේ රෙගුලාසි වලට අනුකූල වීම ගත් උත්සහායන් පිළිබඳව යුරෝපා සංගම් බලධාරීන් අගයා ඇතැයි යුරෝපා සංගමය නිකුත් කළ නිවේදනයක සඳහන් වේ.

කෙසේ වෙතත් ඉදිරි මාස වලදී යුරෝපා සංගමය වෙත මසුන් අපනයනය කිරීම පිළිබඳ තහනම ඉවත් කිරීමේ අරමුණෙන් නීතිවිරෝධී ,වාර්තා නොවන හා නියාමනය නොකෙරෙන ධීවර කර්මාන්තය පිළිබඳව යුරෝපා සංගම් නීතිය යටතේ සෙසු අඩුපාඩු නිවැරදි කර ගැනීමට අවශ්‍ය කරන වැඩිදුර පියවර ගැනීමට අවශ්‍ය කරන වැඩිදුර පියවර ගැනීමට ශ්‍රී ලංකා බලධාරීන් මෙන්ම යුරෝපා සංගම් බලධාරීන් එක්ව වැඩ කිරීමට එකඟ වූ බවද එම නිවේදනයේ සඳහන්ව ඇත.

මෙරටට පැනවූ යුරෝපා මත්ස්‍ය තහනම ගැන වැඩිදුරටත් අධ්‍යනය කිරීම හා සාකච්ඡුා කිරීමේ අරමුණින් එම සංගමයේ  සමුද්‍ර කටයුතු හා ධීවර කර්මාන්ත අධ්‍යක්ෂ මණ්ඩල ජනරාල්වරයාගේ නියෝජිත කණ්ඩායමක් ඉකුත්දා මෙරටට පැමිණි අතර  ඔවුන් මේ සම්බන්ධයෙන් ධීවර බලධාරීන් සමඟ සාකච්ඡා පැවැත්වීය.

ශ්‍රී ලංකාවෙන් අපනයනය කෙරෙන ධීවර නිෂ්පාදන වෙනුවෙන් යුරෝපා සංගමය පනවා ඇති තහනම ඉවත් කර ගැනීම සඳහා රජය ඉකුත් ජනවාරි මාසයේ සිට ගනු ලැබූ පියවර සහ අන්තර්ගත ප‍්‍රගති වාර්තාව මේවන විට යුරෝපා සංගමයේ සමුද්‍ර සහ ධීවර කටයුතු පිළිබඳ අධ්‍යක්ෂ ජනරාල් කාර්යාලය වෙත ඉදිරිපත් කිරීමට රජය පියවර ගෙන තිබිණි.