ශ්‍රී ලංකා ක‍්‍රිකට් කණ්ඩායම ශ්‍රී ලංකාවේදී සහභාගි වන අන්තර්ජාතික ක‍්‍රිකට් තරගවල රූපවාහිනී අයිතිය විකිණීමේ ගණුදෙනුව පිළිබඳව සිදුවූයේ යැයි කියන ඉහළ මැදිහත්වීමක් හේතුවෙන් විවෘත ටෙන්ඩර් කැඳවීමට සූදානම් වන ලෙස ශ්‍රී ලංකා ක‍්‍රිකට් ආයතනයට උපදෙස් දී ඇතැයි වාර්තා වේ.

ඒ සම්බන්ධයෙන් ශී‍්‍ර ලංකා කි‍්‍රකට් ආයතනයෙන් කළ විමසීමකදී එහි අළෙවි අංශයේ උසස් නිලධාරියකු පවසා සිටියේ ටෙන්ඩර් කැඳවීමක් පිළිබඳ කිසිවක් තමන්ට දන්වා නැති නමුත් මීට පෙර විකාශන අයිතිය හිමි ‘ටෙන් ස්පෝට්ස්’ ආයතනය සමගම ඒ සම්බන්ධයෙන් සාකච්ඡවක් කෙරෙමින් පවතින බවත්ය.

ක‍්‍රිකට් තරග විකාශය කිරීමේ අයිතිය, ටෙන්ඩර් කැඳවීමකින් තොරව, වසර හතක කාලයක් සඳහා ඩොලර් මිලියන 53 කට විකිණීමේ සූදානමක් ඇතැයි මීට පෙර වාර්තා විය.

මෙම ගනුදෙනුව පිළිබඳව මාධ්‍ය වාර්තා පළවීමෙන් පසු ඉහළ මැදිහත්වීමකින් මෙයට සම්බන්ධ සියලූම පාර්ශව කැඳවා, අදාළ ගනුදෙනුව ශ්‍රී ලංකා ක‍්‍රිකට් ආයතනයට අලාභයක් නොවන පරිදි කරන ලෙස උපදෙස් දුන් බවත් එම රැස්වීමට හිටපු කී‍්‍රඩා ආමාත්‍යවරයකු ද කැඳවූ බවත් වැඩි දුරටත් දැනගන්නට තිබේ.

රූපවාහිනී අයිතිය විකිණීම පිළිබඳ ගනුදෙනුව සම්බන්ධයෙන් ශ්‍රී ලංකා ක‍්‍රිකට් ආයතනයේ හිටපු සභාපතිවරයකු සහ ශ්‍රී ලංකා ක‍්‍රිකට් පිලේ හිටපු ප‍්‍රබල ක‍්‍රීඩකයකු වගකිවයුතු පාර්ශව දැනුවත් කිරිමෙන් පසුව මෙම පියවරගත් බව ද දැනගන්නට තිබේ.

මේ අතර ශ්‍රී ලංකා ක‍්‍රිකට් ආයතනයේ නිලවරණය හැකි ඉක්මනින් පවත්වන ලෙස ද උපදෙස් ලැබී ඇති බවත් දැනගන්නට ඇත.