ශ්‍රීලංකා පොලිසියේ ප්‍රථම මාධ්‍ය ප්‍රකාශක ලෙස කටයුතු කළ පොලිස් අධිකාරී මයිකල් රියෙන්සි චන්ද්‍රලාල් පෙරේරා මහතා ඊයේ (24) මිය ගියේය.

මියයන විට ඒ මහතා 67 වැනි වියේ පසුවිය.

1972 වසරේදී ආධුනික උප පොලිස් පරීක්ෂකවරයෙක් ලෙස පොලිස් සේවයට එක්වූ පෙරේරා මහතා 1998 වසරේදී ජේ්්‍යෂ්ඨ පොලිස් අධිකාරීවරයෙක් ලෙස උසස්වීම් ලැබුවේය.අනතුරුව 2007 වසරේ සිට නැගෙනහිර දිසාව භාර වැඩබලන නියෝජ්‍ය පොලිස්පති ලෙස සේවය කළ ඔහු පොලිස් සේවයෙන් විශ්‍රාම ගියේ 2008 වසරේදීය.

1998 වසරේදීම පොලිස් මහජන සම්බන්ධතා කොට්ඨාශයේ අධ්‍යක්ෂක ලෙසද පත්වීම් ලැබූ පෙරේරා මහතා  එම තනතුරේ කටයුතු කරන අතරම ශ්‍රීලංකාවේ ප්‍රථම පොලිස් මාධ්‍ය ප්‍රකාශක ලෙසද වසර 9 ක් පුරාවට තම සේවය ලබාදුන්නේය.

දෙස් විදෙස් පාඨමාලා රාශියක් හදාරා දැනුම ලබාගෙන ඇති පෙරේරා මහතා ශ්‍රී ජයවර්ධනපුර විශ්වවිද්‍යාලයේ බාහිර කථිකාචාර්යවරයෙක් ලෙසද කටයුතු කර ඇති අයෙකි.

පොලිස් ක්‍රියාකාරකම් දැක්වෙන චිත්‍රපට ප්‍රදර්ශන,විවිධ තේමා යටතේ දේශන පැවැත්වීම් ආදී පොලිසිය හා මහජනයා එකිනෙකාට සමීප කරන වැඩපිළිවෙල රැසක් ඔහුගේ සේවා සමයේ ක්‍රියාවට නැංවිනි.

රියෙන්සි චන්ද්‍රලාල් පෙරේරා මහතාගේ අවසන් කටයුතු හෙට (26) බොරැල්ල කනත්තේදී සිදුකිරීමට නියමිතය.