කුඩා කල නිවේදනය තම ජීවිතය කරගත් දුමිදු ධනංජය වත්මන විට නිරූපණ ක්ෂේත‍්‍රයේ දිගුගමනක් යෑමට බලාපොරොත්තුවෙන් සිටියි. දුමිදු අපිත් සමගින් එකතු වූයේ ඔහුගේ මේ දිනවල වැඩ කටයුතු "සාරවිට" තරු කතා බහ හා බෙදා හදා ගැනීමටයි.

දුමිදු කොහොමද ජීවිතේ ? මේ දිනවල මොකද කරන්නේ ?

හොඳයි හොඳින් සුපුරුදු පරිදි ජීවිතය ගෙවෙනවා. මං රැකියාව කරන්නේ ලංකා ඛනිජ තෙල් සංස්ථාවේ. ඒ නිසා මේ දිනවල නම් මගේ රැකියාව නිසා ටිකක් කාර්ය බහුල වෙලයි ඉන්නේ.

මේ ක්ෂේත‍්‍රයට පැමිණීම ගැන සඳහන් කළොත් ?

ඒක සිද්ධවෙන්නේ මෙහෙමයි. මම මුලින්ම "ෆැෂන් ටෙක්" ආයතනයේ අකිල රන්වල මහතා යටතේ "ෆැෂන් ඩිසයිනින්" ඩිප්ලෝමාවක් හැදෑරුවා. ඊට පසුව ලංකා "මොඩල් ඇන්ඩ් ෆැෂන් ඇකඩමි" හා සම්බන්ධ වෙනවා. අනුෂ්ක සිල්වා මහතා ඒ සඳහා මට උපරිම සහායක් ලබාදෙනවා. මේ ක්ෂේත‍්‍රයට පැමිණීමට මුල්ම අඩිතාලම වැටෙන්නේ එහෙමයි.

නිරූපණ ක්ෂේත‍්‍රයේ දැන් ඔබ දායකවී ඇති වැඩ කටයුතු ගැන සඳහන් කළොත් ?

මම දැනට මේ ක්ෂේත‍්‍රයට පැමිණ ටික කාලයයි. ඒත් මම මේ වනවිට වෙළෙඳ දැන්වීම් කිහිපයකට, ෆොටෝ ෂූට් වලට හා මියුසික් වීඩියෝ එකකට සහභාගි වෙලා තියෙනවා. මගේ රැකියාවත් එක්ක මට මේ ක්ෂේත‍්‍රයට දායක වෙන්න කාලය බොහෝම අඩුයි. ඒ නිසා රැකියාවත් සමග සමබරව දෙකම කරගෙන යනවා.

නිරූපණ ක්ෂේත‍්‍රයට පැමිණීම කුඩා කල පටන් තිබූ ඔබේ හීනයක්ද ?

නෑ. මම කුඩා කාලයේ මේ ක්ෂේත‍්‍රයට පැමිණීම ගැන කිසිම ආසාවක් තිබුණේ නෑ. කුඩා කල පටන් නිවේදන කටයුතු වලටයි මම මුල්තැන දුන්නේ. පාසල් යන කාලයේ සිට නිවේදන අංශයෙන් බොහෝ ජයග‍්‍රහණ අත්කරගෙන තිබෙනවා. කොහොම වුණත් අවසානයේ නතර වෙන්නේ නිරූපණ ක්ෂේත‍්‍රයෙන් කියලා මම හිතනවා.

ඔබ දැන් මේ යන ගමන ගැන ඔබේ පවුලෙන් ලැබෙන සහාය මොනවගේද ?

මගේ පවුලේ ඉන්නේ මමයි අම්මයි තාත්තයි නංගියි. එයාලා මට උපරිම සහයෝගයක් ලබාදෙනවා. මගේ ශක්තිය වන්නේ මගේ පවුල. ඔවුන් මගේ හැමදේකටම උදවු කරනවා.

ලංකාවේ මොඩලින් ගත්තොත් එය හොඳ තැනක තියනවා කියලා හිතනවාද ?

මට හිතෙන විදියටනම් ලංකාවේ මොඩලින් පැත්ත ගත්තොත් අපට බොහෝ සෙයින් අසාධාරණයක් වෙනවා. අද වනවිට පිරිමි පාර්ශ්වයට වඩා කාන්තා පාර්ශ්වය මොඩලින්වලින් ඉදිරියෙන් ඉන්නවා. ඒක සාමාන්‍ය දෙයක් ඒ වුණත් හැමෝටම එක වගේ සහභාගීත්වයක් තියෙන්න ඕනේ. ඒ මගේ අදහසයි.

ඉදිරියේදී ඔබව දකින්න පුළුවන් අලුත් වැඩකටයුතු මොනවාද ?

ඉදිරියට නම් මියුසික් වීඩියෝවලට, ටෙලිනාට්‍ය වලට සහභාගී වෙන්න බලාපොරොත්තුවෙන් ඉන්නවා. ඒ සමගම මගේ රැකියාවටත් මුල්තැන දෙන්න මම අමතක කරන්නේ නෑ.

ඔබේ මේ ගමනට සෙවණැල්ල මෙන් ඔබ පසුපස රැඳී සිට උදවු කළ පිරිසකුත් ඇති නේද ?

ඔව් මගේ පවුලේ අයට මම මුලින්ම ස්තුති කරන්න ඕනේ මීට අමතරව මට මේ ක්ෂේත‍්‍රයට එන්න උදවු කළ සියලු දෙනාට මගේ ස්තුතිය පුද කරනවා.

සටහන සහ ඡායාරූප - චමත් වින්දුල