ලන්ඩන් නුවර මහමෙව්නාව ජාත්‍යන්තර භාවනා මධ්‍යස්ථානය මෙවරත් වෙසක් පුන් පොහොය වෙනුවෙන් දාන ශීල භාවනා සහ සිරි ගෞතම බෝධි වන්දනා වැඩසටහනක් පැවැත්විය.

ලන්ඩන් මහමෙව්නා අසපුව පිහිටා ඇත්තේ ලන්ඩන් නුවරින් බැහැර ගම්බද සාමකාමී නිසංසල පරිසරයක පිහිටි විශාල භුමි භාගයකය.

එහි පින්කම් සඳහා සහභාගීවන සැදැහැවතුන්ගේ සංඛ්‍යාව ශීග්‍රයෙන් ඉහළ යාම හේතුවෙන් මෙවර වෙසක් පිංකම පැවැත්වීමට සිදුවුයේ ඒ අසල පිහිටි මනරම් ශාලාවකදීය. 

මහමෙව්නාවේ තරුණ දායක පිරිස විසින් පිංකම සඳහා එහි ඉතා අලංකාර බුදුමැදුරක් ඉදි කළහ

එහි බුද්ධ ප්‍රතිමා වහන්සේ නමක්, විශාල තඹ පාත්‍රයක රෝපණය කර ඇති බෝධීන් වහන්සේ නමක් සහ සධාතුක ධාතු කරඬුවක් තැන්පත් කර තිබුණි.

මේදිනවල ලංඩන් නුවර දැඩි ශීතලත් ,වර්ෂාවත් පැවතුණද එදින පිංකම සඳහා සුදුවතින් සැරසුණ ලොකු කුඩා සැදැහැවතුන් විශාල පිරිසක් සහභාගී වුහ. ඒ අතරින් බොහෝ දෙනෙක් අට සිල් සමාදන්ව සිටියහ.

එහි ප්‍රධාන ශාලාවත් එයට අමතරව දෙවැනි ශාලාවත් සැදැහැවතුන්ගෙන් පිරී තිබුණි. ප්‍රධාන ශාලාවේ සිදුවූ සියලු පිංකම් දෙවැනි ශාලාවේ විශාල තිරයක් මත පෙන්වීම සඳහා පියවර ගෙන තිබුණි.

දවස පුරාවටම මහමෙව්නා අසපු වාසී භික්ෂුන් වහන්සේ බුද්ධ පුජා, ගිලම්පස පුජා, ධර්ම දේශනා, ධර්ම සාකච්චා සහ භාවනා වැඩ සටහන් පැවැත්වුහ.

දරු දැරියන් වෙනුවෙන් උදෑසන 8 සිට දහවල 3 දක්වා විශේෂ වැඩසටහන් සංවිධානය කර තිබුණි. දරු දැරියෝ බෙහෝ දෙනෙක් ද අට සිල් සමාදන්වුහ.

පිංකම අවසන් වුයේ  සිරි ගෞතම බෝධි බෝධි වන්දනාවෙනි. 

එහිදී මීට පෙර කිරිබත්ගොඩ ඥානානන්ද ස්වාමීන් වහන්සේ විසින් පවත්වන ලද වන්දනා වැඩ සටහනක් අනුගමනය කැරිණි.

මෙම වැඩ සටහන අන්තර්ජාලය ඔස්සේ ලොව පුරා සජීවීව බෙදා හැරිණි.

ශ්‍රී ලංකාව ඇතුළු ලෝකයේ බොහෝ රටවල සැදහවතුන් විශාල පිරිසක්ද අන්තර්ජාලය ඔස්සේ පිංකම සඳහා සහභාගීවනු දැකගත හැකිවිය.

මුළු දවස පුරාවටම පවත්වන ලද මෙම වෙසක් පිංකම ඉතාමත් සැලසුම් සහගත අන්දමට හා නියමිත වෙලාවට සියලු වැඩකටයුතු සිදුවන ආකාරයෙන් ක්‍රියාත්මකවීම මෙන්ම ඒ සඳහා සහභාගීවූ ලොකු කුඩා සියලුම දෙනා ඉතාමත් සැනසුණු සිතින් හා සංවර භාවයෙන් යුතුව ක්‍රියා කරනු දැකගත හැකිවීම විශේෂත්වයකි.

අසපු භූමියද අලකාර බුදුරුවකින් සහ පහන් කුඩු යොදා මනාව සරසා තිබිණි.