අගය එකතු කිරීමේ වැට් බදු පනත පාර්ලිමේන්තුවට ඉදිරිපත් කිරීමේ දී ශ්‍රී ලංකා ආණ්ඩුක්‍රම ව්‍යවස්ථාවේ 152වැනි වගන්තිය ප්‍රකාරව සිදු කර නැති බවත්, එහෙයින් එම පනතේ අන්තර්ගතය ගැන ශ්‍රේෂ්ඨාධිකරණය කිසිත් විමසා නොබලන බවත් මෙම ක්‍රියාවලිය නිවැරදි කළ යුතු බවත් ශ්‍රේෂ්ඨාධිකරණය අද කතානායක කරු ජයසූරිය මහතාට සිය තීන්දුව සැළ කළේය.

152 වගන්තිය මෙසේය.

152. ජනරජයේ ඒකාබද්ධ අරමුදලෙන් නැතහොත් ජනරජයේ වෙනත් අරමුදලකින් යම්කිසි මුදලක් ගෙවීමට හෝ එකී අරමුදල්වලට වැය බරක් පැවරීමට හෝ යම්කිසි බද්දක් පැනවීමට හෝ තත් කාලයේ බලපවත්නා යම්කිසි බද්දක් ඉවත් කිරීමට, වැඩි කිරීමට නැතහොත් අඩු කිරීමට හෝ බලය පවරන්නා වූ කිසිම පනත් කෙටුම්පතක් හෝ යෝජනාවක්, අමාත්‍යවරයකු විසින් විනා අන් කිසිවකු විසින් පාර්ලිමේන්තුවට ඉදිරිපත් කළ නොහැක්කේ ය. තව ද, අමාත්‍ය මණ්ඩලය විසින් අනුමත කොට ඇතොත් මිස හෝ අමාත්‍ය මණ්ඩලය විසින් නියම කරනු ලබන යම්කිසි ආකාරයකට අනුමත කොට ඇතොත් මිස, එවැනි පනත් කෙටුම්පතක් හෝ යෝජනාවක් හෝ අමාත්‍යවරයකු විසින් වුව ද පාර්ලිමේන්තුවට ඉදිරිපත් කළ නොහැක්කේ ය.

ඒ අනුව වෙනත් පනතක් ඉදිරිපත් කරන බව අගමැති රනිල් වික්‍රමසිංහ මහතා පැවසීය.

අගමැති - මෙවැනි පනත් මීට පෙර සම්මත වී තිබෙනවා. ඒ ගැන සොයා බලන ලෙස කතානායකතුමාගෙන් ඉල්ලා සිටිනවා.

දිනේෂ් ගුණවර්ධන - මෙය පරාජයක් ලෙස සලකන්න එපා.

අගමැති - නෑ නෑ එහෙම සලකන්නේ නෑ. නමුත් එවැනි පනත් මීට පෙර සම්මත වූයේ කෙසේදැයි සොයා බැලිය යුතුයි.

කතානායක - පක්ෂ නායක රැස්වීමකදී මේ ගැන සාකච්ඡා කර තීන්දුවක් දෙනවා.

ශ්‍රේෂ්ඨාධිකරණ තීන්දුව හැන්සාඩ් පත්‍රයට ඇතුළු කරන ලෙස ද කතානායක නියෝග කළේය.