හිටපු ඇමැති විමල් වීරවංශ මහතා ද, ඔහුගේ උපන් දිනය වෙනස් කර ඇතැයි රහස් පොලිසිය අද (23) බී වාර්තාවක් මඟින් අධිකරණයට දැන්වීය. 

ඒ වාර්තාව අනුව ඔහු ඉපැදී ඇත්තේ 1965.03.07 වැනි දා ය. පසුව එය 1970.03.07 වශයෙන් වෙනස් කර ඇත. ඔහුගේ බිරිය ශෂීගේ සැබෑ උපන් දිනය 1967.02.01 වැනි දා ය. ඇය එය 1971.02.03 වශයෙන් වෙනස් කර ඇත.

ඔවුන් මෙලෙස උපන් දින වෙනස් කර ඇත්තේ දරුවන්ගේ උප්පැන්නවලට යෙදීමට බව ද  රහස් පොලිසිය අධිකරණයට දැන්වීය.

වීරවංශගේ බිරිය ශෂී නොහොත් රණසිංහ රන්දුනු මුදියන්සේලාගේ සෙහාෂා උදයකාන්ති නොහොත් රණසිංහ රන්දුනු මුදියන්සේලාගේ සිහර්ෂා උදයකාන්තිද ජාතික හැඳුනුම්පත් දෙකක් ලබාගෙන ඇත. එකක් 1967 දීය. එහි අංකය 675320233 වෙයි. සිහර්ෂා උදයකාන්ති නමින් ඇය 1971 දී ලබා ගත් ජාතික හැදුනුම්පතේ අංකය 715344696 වෙයි.

මේ අනුව වීරවංශ අවුරුදු පහකින් ද, ඔහුගේ බිරිය  ඔවුන්ගේ වයස අවුරුදු හතරකින් ද උපන්දින වෙනස් කර ඇතැයි රහස් පොලිසිය අධිකරණයට දැන්වීය.

වීරවංශගේ බිරිය N1284124 හා D3642817 යන අංක යටතේ ගමන් බලපත්‍ර දෙකක් ලබාගෙන ඇත. ඇය එම හැඳුනුම්පත් හා ගමන් බලපත් උපයෝගී කරගෙන බැංකු ගිණුම් කිහිපයක් පවත්වාගෙන ගනුදෙනු කර ඇතැයිද හේවාපතිරණගේ චමින්ද පෙරේරා ජනවාරි 23 වැනිදා කළ පැමිණිල්ලක් අනුව පරීක්ෂණ ඇරඹීයයිද රහස් පොලිසිය අධිකරණයට දැන්වීය.

ඇය අසනීපයෙන් පසුවන බැවින් අධිකරණ වෛද්‍ය නිලධාරී ලවා පරීක්ෂා කර ගැනීමට කොළඹ මහේස්ත්‍රාත් ගිහාන පිලපිටිය මහතාගෙන් අවසර ඉල්ලා තිබුණි.

ඇගේ කට උත්තරයක් ගැනීමට හෝකන්දර මංගල මාවතේ නිවසට ගිය අවස්ථාවේ ඇය නොසිටි බවත් ඒ අනුව නීතිපතිගේ උපදෙස් පැතූ බවත් පොලිසිය මහේස්ත්‍රාත් හමුවේ ප්‍රකාශ කළේය. මේ අතර ඇය වෙනුවෙන් පෙනී සිටි නීතිඥවරයකු රහස් පොලිසියට දන්වා ඇත්තේ ඇය මාලඹේ දොස්තර නෙවිල් ප්‍රනාන්දු රෝහලට ඇතුළු කළ බවයි. පෙබරවාරි 22 වැනිදා උසාවි නියෝගයක් ලබා ඇය අධිකරණ වෛද්‍ය නිලධරයකු ඇය පරීක්ෂා කර අත් අඩංගුවට ගත් බව පොලිසිය කීවේය. අධිකරණ වෛද්‍ය නිලධාරී ඒ. ඉලංගවන් මහතා ඇය පරීක්ෂා කර පවසා ඇත්තේ ප්‍රකාශයක් සටහන් කරගැනීමට සුදුසු මානසික තත්ත්වයක ඇය පසුවන බවයි. එහෙත් රහස් පොලිසිය ඔහුගේ වාර්තාව උසාවිය කල් තබන තුරු ඉදිරිපත් කළේ නැත. ඒ අනුව ඇය මාර්තු 9 වැනිදා තෙක් රිමාන්ඩ් භාරයේ තබන ලෙස බන්ධනාගාර අධිකාරීට නියම කරන්නැයි රහස් පොලිසිය කළ ඉල්ලීම සම්බන්ධයෙන් තීරණයක් නොවීය.