බම්බලපිටියේ ව්‍යාපාරික මොහොමඩ් ශකිබ් සුලෙයිමාන් ගේ ඝාතනය රුපියල් ලක්ෂ 400කට වැඩි මුදල් ගනුදෙනුවක් මත සිදුවන්නට ඇතැයිද වැල්ලවත්තේ ව්‍යාපාරිකයකුගෙන් මේ ගැන ප්‍රශ්න කර ඇතැයි ද පොලිසිය කියයි.

ඔහුට අමතරව දෙහිවල සහ වැල්ලවත්තේ ව්‍යාපාරිකයන් දෙදෙනකුගෙන් කටඋත්තර ලියාගෙන ඇතැයි පොලිසිය පවසයි.

දැනට පරීක්ෂණයට යොදවා ඇති මුළු පොලිස් කණ්ඩායම් ගණන 11ක් බවත් පොලිසිය කියයි. කොල්ලුපිටිය සිට වැල්ලවත්ත දක්වා සියලු සීසීටීවී කැමරා පරීක්ෂණයට ලක් කිරීමටත් පොලිසිය සැරසෙයි.

බම්බලපිටියේ රෙදිපිළි ව්‍යාපාරික මොහොමඩ් ශකිබ් සුලෙයිමාන්ගේ (29) පැහැරගෙන පැයක් ඇතුලත මොට ආයුධයකින් ඔහුගේ කනකට ඉහළින් එල්ල කළ දරුණු පහරකින් ඔහු මිය ගිය බවට කෑගල්ල රෝහලේ ප්‍රධාන අධිකරණ වෛද්‍ය නිලධාරි දොස්තර රමේෂ් අලගියවන්නගේ වාර්තාවේ සඳහන් වෙයි.

ඔහුගේ සිරුර බදාදා (24) මාවනැල්ල, හෙම්මාතගම, රුකුලගම හන්දිය ආසන්නයේ දමා තිබියදී සොයා ගැනිණි. මාවනැල්ල මහේස්ත්‍රාත් මහින්ද ලියනගම මහතා සිද්ධිය වු ස්ථානයට ගොස් මරණ පරික්ෂණ පැවැත්වීය. සුලෙයිමාන්ගේ දේහය අදම (25) කොළඹ දී මිහිදන් කිරිමට නියමිතය.

සුලෙයිමාන් මහතා මඟුල් ගෙදරක ගොස් ගෙදර  එද්දී පැහැර ගත් බව නෑයෝ කියති. පශ්චාත් මරණ පරික්ෂණයේ දී සොයා ගැනුණේ ඔහු අවසන් වරට ගත් ආහාර දිරවා නැති බවයි. කෑම ගැනීමෙන් පැය තුන හතරකට පසු ආහාර දිරවන බවත් සුලෙයිමාන් මහතා කෑම ගැනීමෙන් පැයක් යන්නට පෙර මරණිය තුවාල ලබා ඇති බව පෙනෙන බවත් දොස්තර අලගියවන්න මහේස්ත්‍රාත්ට ඉදිරිපත් කළ වාර්තාවේ සඳහන් වෙයි.

සුලෙයිමාන් මහතාගේ ඝාතනය සම්බන්ධයෙන් පොලිසියට අවශ්‍ය වන පස් දෙනකු රටින් පිටවීම වැළැක්වීම සඳහා කොළඹ අතිරේක මහේස්ත්‍රාත් නිශාන්ත පීරිස් මහතා මින් මද වේලාවකට පෙර ආගමන විගමන පාලකට හා පොලිස් බුද්ධි අංශ අධ්‍යක්ෂකට නියෝග කළේය.

කොළඹ අපරාධ විමර්ශන කොට්ඨාසය ඉල්ලා සිටියේ පුද්ගලයන් පස් දෙනකු මේ සිද්ධීයේ වැදගත් තොරතුරු දන්නා බවට පොලිසියට විස්තර ලැබී ඇති බවයි.

ඔවුන් එතෙර යාමට තැත් කළහොත් අත්අඩංගුවට ගන්නැයි මහේස්ත්‍රාත්ගේ නියෝගයේ සඳහන් වේ.

සුලෙයිමාන් දෙදරු පියෙක් වන අතර මොහොමඩ් අරිෆ් අබ්දුල් ෂානි (24) ඔහුගේ බිරිය වේ. පවුලේ එකම පිරිමි දරුවා වන ඔහුට බාල සහෝදරියන් දෙදෙනෙකි. කොළඹ බ්‍රිටිෂ් ජාත්‍යන්තර පාසලෙන් අධ්‍යාපනය ලබා ඇති සුලෙයිමාන් පිය උරුමයෙන් ලද ව්‍යාපාරික කටයුතුවලට මීට අට වසරකට පෙර සිට සම්බන්ධ වී ඇත.