රාජ්‍ය බුද්ධි අංශයේ ප්‍රධානි නියෝජ්‍ය පොලිස්පති චන්ද්‍ර වාකිෂ්ට මහතාට රාවය පුවත්පතින් අපහසුතාවක් සිදු වූ බවට කළ පැමිණිල්ලක් මත රාවය කර්තෘ ඒ ඩබ්ලිව් ජනරංජන මහතාගෙන් ඊයේ (08) පස්වරුවේ අපරාධ පරීක්ෂණ දෙපාර්තමේන්තුව පැය තුනකට අධික කාලයක් ප්‍රශ්න කළ බව පොලිස් මාධ්‍ය ප්‍රකශක ජ්‍යෙෂ්ඨ පොලිස් අධිකාරී අජිත් රෝහණ මහතා කියයි.

ජනරංජන මහතා කීවේ අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරිවරයකු තමාට දුරකථනයෙන් කථා කොට මෙම ප්‍රවෘත්තිය සම්බන්ධයෙන් ප්‍රකාශයක් ලබා ගැනීමට එහි එන ලෙසයි.

ඉකුත් සිකුරාදා තමන් වෙත දැනුම් දුන් බවත්, ප්‍රවෘත්තියක් සම්බන්ධයෙන් අපරාධ පරීක්ෂණ දෙපාර්තමේන්තුවට ප්‍රකාශ ලබා ගැනීම නම් පුවත්පත් කාර්යාලයයට පැමිණීම හිටපු ජනාධිපතිනියගේ කාලයේ පටන් සිදුවූ ක්‍රියාවක් බවත් එම නිලධාරියාට දැනුම් දුන්න ද ඔහු එයට එකඟ නොවූ නිසා තමන් ඊයේ (09) සවස හතරට නීතීඥවරයකු සමඟ එහි ගිය බව ද ඔහු සඳන් කළේය.

තමන්ගේ ප්‍රකාශය ලියා ගන්නා අවස්ථාවේ අපරාධ පරීක්ෂණ දෙපාර්තමේන්තුව තම නීතීඥවරයා එම ස්ථානයෙන් ඉවත් කළ බවත්, එය නීතියට පටහැනි ක්‍රියාවක් බවත් ජනරංජන මහතා කියයි.

මෙම ප්‍රවෘත්තිය ලිව්වේ කවුද, එහි මූලාශ්‍රය ලබා ගත්තේ කාගෙන් ද, එම තොරුතරු තහවුරු කරගෙනද මෙම ප්‍රවෘත්තිය පළ කළේ, රාවය පුවත්පතේ පිටපත් කීයක් මුද්‍රණය කරනවා ද, ඒවා මිලදී ගන්නේ කවුද යනුවෙන් නොයෙක් ප්‍රශ්න ඇසූ බවත්, පුවත්පත් ආචාර ධර්ම පද්ධතියට අනුව එම ප්‍රශ්න වලට පිළිතුරු දුන් බවත් ඒ මහතා පැවසීය.