2016 වසරේ ජනතාවගේ සිතුම් පැතුම් ඉටු කිරීමට කටයුතු කරන බවත් වරාය හා නාවික ඇමැති සමග එකට අත්වැල් බැඳගෙන හම්බන්තොටින් පටන්ගෙන වරාය නගා සිටුවීමට ගත හැකි ඉහළම ක්‍රියා මාර්ග ගන්නා බව වරාය හා නාවික නියෝජ්‍ය ඇමැති නිශාන්ත මුතුහෙට්ටිගම මහතා ගාල්ල බද්දේගමදී ජන හමුවක් අමතමින් පැවසීය.

‘හම්බන්තොට වරාය මේ රටේ දියුණුම වරාය බවට පත් කිරීමට කටයුතු කරනවා. ගාල්ල වරාය සංචාරක වරායක් ලෙස නගා සිටුවීමේ බලාපොරොත්තුව යථාර්ථයක් කරනවා. කළු කොඩි දාන ජාතික කොඩි දාන අයට අපි කියනවා මේ රටේ මිනිසුන්ගේ බලාපොරොත්තු තිබෙන්නේ කළු කොඩි මත ජාතික කොඩි මත නෙවෙයි. මිනිසුන්ගේ බඩගින්නට උත්තර හොයන ආණ්ඩුවක් හැටියට මේ ආණ්ඩුව කටයුතු කරනවා. මොනම බලවේගයකටවත් හොල්ලන්න බැරිවිදියට අවුරුදු හතර හමාරක් මේ ආණ්ඩුව ඉදිරියට යනවා. සද්දේ නැති වුණත් මෙය වැඩකරන ආණ්ඩුවක්‘ යැයිද මුතුහෙට්ටිගම මහතා කීවේය.