කවුරැත් බලන්න යන තැන් වලින් එළියට බැහැලා වෙනස්ම සංචාරක ස්ථාන හොයාගෙන යද්දි තමයි වැටහෙන්නේ ශ්‍රී ලංකාව කොච්චර ලස්සනද කියලා. ස්වභාවදහම නිර්මාණය කරලා තියෙන පුදුමාකාර නිර්මාණ එකකට එකක් ඒවායේ සුන්දරත්වයෙන් පරදින්න සූදානම් නැහැ. අද walk 21 එක්ක ඔබ මේ යන්න සූදානම් වෙන්නේ සමහරවිට අහලවත් නැති තැනකට වෙන්න ඇති. මේ තමයි අරදුණු ඇල්ල. බදුල්ලට ගිහින්, බදුල්ලෙන් පස්සරට ගිහින්, පස්සර ඉඳලා මඩොල්සිම පාරේ කිලෝමීටර් 3ක් විතර ගියාම තියෙනවා මඩුගස්තලාව කියලා පාරක්. අන්න ඒ පාරේ තව කිලෝමීටර් 2ක් ගියාම මේ අපූරැ ඇල්ල හමුවෙනවා.

පුරාණ වළගම්බා සමයේ මේ ඇල්ලට යටින්, ඇල්ල ඇතුළෙන් කිලෝමීටර් ගණනක් දිග උමඟක් සෑදුවා කියලා ගමේ උදවිය අදටත් කියනවා. ඒත් උමඟක් තියෙනවාද නැද්ද බලන්නත් අපහසු තරමට ඇල්ලේ යට කොටසේ ජලය වේගයෙන් කඩා වැටෙනවා. ඇල්ලේ යට කොටස කියලා කිව්වේ අරදුණු ඇල්ල කොටස් තුනකට කඩාවැටෙන නිසා. මේ ඇල්ල ඉහළ, මැද හා පහළම කොටස විදියට ආකාර තුනකට තමයි කඩා හැලෙන්නේ. මේ ඡායාරෑප හොඳින් බැලුවොත් ඒක පෙනේවි. හරියට රම්බොඩ ඇල්ල වගේ. අනෙක් දියඇලිවල ඇල්ල වැටෙන තටාකයට වඩා මේ ඇල්ල වැටෙන තටාකය ආරක්ෂිතව දිය ස්නානය කරන්න පුළුවන් තැනක්. සාමාන්‍යයෙන් ඇල්ලක් වැටෙන තැන ගැඹුරැ වලක් හෑරෙනවා. මෙතැනත් ඇල්ල අසලම එහෙම වුණාම එතැනට පොඩ්ඩක් දුරට වෙද්දි පොඩි දරැවෙක්ට වුණත් ආරක්ෂිතව නාන්න පුළුවන් සුන්දර තැනක්.

අරදුණු ඇල්ල මීටර් 36ක් උසින් යුක්ත වුණත් අර මුලින් කිව්වා වගේ මේක කොටස් තුනකට වැටෙන නිසා ලංකාවේ දියඇලි වර්ගීකරණයේ උසින් වැඩි දියඇලි අතරට යන්න බැරිවෙලා. පස්සර වටකරගෙන ඉන්න මහා ශිඛරය තමයි නමුණුකුල කඳුවැටිය. ඉතින් පස්සරට වටිනාකමක් ගෙනෙන අරදුණු ඇල්ලත් නමුණුකුල කඳුවැටියේම තිළිණයක්. නමුණුකුලින් ආරම්භවෙන ලොග්ගල්ඔය තමයි මේ අපූරැ දියඇල්ල නිර්මාණය කරන්නේ.

ඇල්ල අසලම ලංකාවේ බොහෝ දියඇලිවලට වුණා වගේම කුඩා විදුලි බලාගාරයක් හදලා තියෙනවා. බොහෝවිට අනාගතයේ දවසක මේ ඇල්ලත් ජල සේලය ගැලවිලා හිඳිලා යාවි. එහෙම නොවේවා කියන ප්‍රාර්ථනයත් එක්කම ගිහින් බලලා රසවිඳලා එන්න මේ සුන්දර අරදුණු ඇල්ල..

ප්‍රසාද්