(ශ්‍රීනාත් ප්‍රසන්න ජයසූරිය)

ගම්පහ මහාධිකරණය  මරණ ම දඬුවම ලබා දී තිබියදී සැඟව සිටි චූදිතයකු වසර 19කට පසුව රාගම නගරයේදී සැකපිට අත්අඩංගුවට ගත් බව රාගම පොලිසිය කියයි.

මෙසේ සැකපිට අත්අඩංගුවට ගනු ලැබ ඇත්තේ රාගම අලගොල්ල පදිංචි  පෙදරේරුවෙකි.

මෙම පුද්ගලයා ඔහුගේ සහෝදරයා හා එක්ව 2001 දොළොස් වැනි මස 19 වෙනි දින පුද්ගලයකුට තියුණු ආයුධවලින් පහරදී ඝාතනය කිරීම සම්බන්ධයෙන්පොලිසිය  සැකපිට අත්අඩංගුවට ගෙන ගම්පහ මහේස්ත්‍රාත් අධිකරණය හමුවට ඉදිරිපත් කිරීමෙන් පසු බන්ධනාගාර ගත කර ඇත.

මීගමුව බන්ධනාගාරයේ රඳවා සිටියදී 2004 වර්ෂය සිදුවූ සුනාමි ඛේදවාචකය අවස්ථාවේදී වෙනත් බන්ධනාගාරයකට රැගෙන යමින් සිටියදී බන්ධනාගාර නිලධාරීන්ගෙන් මිදී මෙම සැකකරු පලාගොස් තිබිණි යැයි පොලීසිය කියයි.

2004 වසරේ 8 වෙනි මස 31 වැනි දින සැකකරුට අධික යෝජනා භාරදීමෙන් අනතුරුව සැකකරු නොමැතිව නඩු මෙහෙයවා චූදිතයාට මරණ දඬුවම නියම කර තිබිණි.