(යොහාන් භාසුර)

උත්සව සමය තුළ වෙලදපොලේදී පාරිභෝගිකයන් අසාධාරණයට ලක්වීම වැලැක්වීම සදහා පාරිභෝගික කටයුතු පිළිබද අධිකාරිය ආරම්භකර ඇති විශේෂ වැටලීම් වැඩසටහන යටතේ දිවයින පුරා  පිහිටි සුපිරි වෙළදසැල් 23 ක් වටලා නඩු පැවරූ බව පාරිභෝගික කටයුතු පිළිබඳ අධිකාරිය පැවසීය.

එම  සුපිරි වෙළදසැල් අතරින්  වෙළදසැල් 16 ක  කල් ඉකුත් වූ භාණ්ඩ සම්බන්ධවත් සෙසු වෙළදසැල්වල විකිණීමට ඉදිරිපත්කර ඇති භාණ්ඩයන්හි   මිල ප්‍රදර්ශනය නොකිරීම, වැඩි මිලට භාණ්ඩ අලෙවිකිරීම, පාරිභෝගිකයන් නොමග යැවීම  සහ භාණ්ඩවල සදහන්කල යුතු තොරතුරු නොමැතිව විකිණීම යන  වැරදි අනාවරණය වූ බවත් එම අධිකාරිය කීය.

පසුගිය වසරේ කළ  විමර්ශනවලදී  ජාල වශයෙන් පවත්වාගන යන සුපිරි වෙළදසැල් ශාඛා 172 කට එරෙහිව නඩු පැවරීම් සිදුකර ඇති අතර එහිදී වරදකරුවන් වීම නිසා එම ආයතනවලට රුපියල් ලක්ෂ 65 කට අධික දඩ මුදල් අධිකරණය නියම කළ බව කී එම අධිකාරිය වෙලදපොලේ කරන වැටලීම්වලදී සුපිරි වෙළදසැල්වලද වැටලීම් සහ විමර්ශන අඛණ්ඩවම සිදුකරන අතර ඉහත වැටලීම්වලදී අනාවරණය වූ සුපිරි වෙළදසැල් අතරින්  16 ක් පමණ ප්‍රසිද්ධ සුපිරි වෙළදසැල් ජාලවලට අයිති බවද සඳහන් කළේය.

සුපිරි වෙළදසැල් ද ඇතුළුව වෙළදපොලෙන් භාණ්ඩ මිලදීගැනීමේදී කල්ඉකුත්වීමේ දිනය ඇතුළු අනෙකුත් තොරතුරු සම්බන්ධයෙන් නිරන්තරයෙන් පරීක්ෂාකරන ලෙස  පාරිභෝගිකයන්ගෙන් ඉල්ලා ඉල්ලා සිටින බවද පාරිභෝගික කටයුතු පිළිබද අධිකාරිය වැඩිදුරටත් සඳහන් කළේය.