රුපියල් කෝටි හතරකට අධික මුදල් හා දේපලවල හිමිකරුව සිටින බවට චෝදනා ලැබ සිටින හිටපු වරාය සංවර්ධන ඇමැති රෝහිත අබේගුණවර්ධන මහතාට ලබන මැයි මස 04 වැනිදා අධිකරණයේ පෙනී සිටින ලෙස නියම කරමින් කොළඹ මහාධාකරණ විනිසුරු මනිලාල් වෛද්‍යතිලක මහතා අද(27)  සිතාසි නිකුත් කළේය.

2004 මාර්තු මස 31 වැනිදාත් 2006 මැයි මස 31 වැනිදාත් අතර කාලයේ සිය ආදායම් වලින් හෝ ලැබීම් වලින් උපයාගත නොහැකි මුදල් හෝ දේපළ වල හිමිකරුව සිටින ලද බවද එම මුදල් හා දේපළ අල්ලස් මඟින් උපයා ගන්නා ලදැයිද පයාගල පහළගොඩ ලිබර්ටි මාවතේ පහළගේ රෝහිත පියතිස්ස අබේගුණවර්ධන මහතාට එරෙහිව අල්ලස් කොමිසමෙන් මෙම නඩුව පවරා ඇත.

විත්තිකරු විසින් උපයාගත් දේපළ අතර රුපියල් ලකෂ 40කට රත්මලාන සිරිමල් උයනේ නිවස, එහි ඔප්පු ලිවීම සඳහා රුපියල් 1, 59 000/- ක මුද්දර ගාස්තු වැය කිරීම, කේ.එච්.2428 දරන ජීප් රථය බදු රහිතව ආනයනය කිරීමට රුපියල් 35, 74 900/- ක මුදලක් වැය කිරීම, එම වාහනයේ ගාස්තු ලෙස ටොයොටා සමාගමට රුපියල් 2 38 747/-ක මුදලක්ද තීරූ බදු හා වෙනත් බදු වශයෙන් රේගුවට රුපියල් 4 08 046/-ක මුදලක්ද වැය කළ බව අල්ලස් කොමිසම විසින් අධිකරණයට දැනුම් දී ඇත.

විත්තිකරු විසින් උපයාගත් මුදල් අතර එච්.පී.2801 හා එච්.කිව්. 9481 දරන බස් රථ වලට අදාළ රක්ෂණ හා ආදායම් සහතික ලබා ගැනීම සඳහා රුපියල් 1 03 000/-ක මුදලක් වැය කිරීම, මෙම බස් රථ වලට කල් බදු වාරික ලෙස රුපියල් 12 31 093/-ක් වැය කිරීම, සුජීව බෝයගොඩ නමැත්තාට රුපියල් ලකෂ 25ක් ලබාදීම, මේනකා නිලන්ති ද සිල්වා නමැත්තියට දික්කසාද දීමනාව ලෙස රුපියල් ලක්ෂ 10ක් ලබා දීම, බැංකු අයිරාව පියවීමට රුපියල් 1 02 796/-ක් ගෙවීම, බැංකුවෙන් ණයට ගත් මුදලට පොලිය හා වාරික මුදල් ලෙස රුපියල් 1 73 878/-ක් ගෙවීම, ස්ථීර තැන්පතු ලෙස හා වෙනත් තැන්පතු ලෙස බැංකු වල 1 21 33 000/-කට අධික මුදලක් තැන්පත් කොට තිබීම, මුල්‍ය සමාගමක රුපියල් ලකෂ 45ක ස්ථිර තැන්පතු මුදලක් දැමීම, ණය මුදල් පියවීම සඳහා රුපියල් ලකෂ 05කට අධික මුදලක් වැය කිරීම, පිංවත්තේ නිවස අලූත්වැඩියාව සඳහා රුපියල් ලකෂ 6 1/4ක මුදලක් වැය කිරීම, රත්මලාන සිරිමල් උයන නිවසට විදුලිය ගැනීම ස`දහා රුපියල් ලකෂ 2 1/2කට ආසන්න මුදලක් වැය කිරීම, ඇතුළු සිද්ධීන් රැසක් අල්ලස් කොමිසම විසින් නඩු ගොනුවට ඇතුලත් කොට ඇත.