හැත්තෑ හතේ ආච්චි මිණිපිරියන් සමග බූරුවා ගහලා

(චමිලා අල්විස්)

අඟුරුවාතොට උඩුවර ප්‍රදේශයේ නිවෙසකදී මිනිබිරියන් දෙදෙනා ඇතුළු පිරිසක් සමඟ මුදල් ඔට්ටුවට බූරු ගසමින් සිටි බවට අධිකරණයට ඉදිරිපත් කළ 77 හැවිරිදි කාන්තාවකට සහ තවත් සැකකරුවන් තිදෙනකුට මාස තුනක අත්හිටවූ සිර දඬුවමක් නියම කළ හොරණ ප්‍රධාන මහේස්ත්‍රාත් ලක්මිණි විදානගමගේ මහත්මිය, ඔවුන්ට පැය 50 බැගින් ප්‍රජා සේවයේ යෙදෙන ලෙස ද නියෝග කළාය.

මෙම ප්‍රජා සේවය ඔවුන් පදිංචි නිවෙස ආසන්නයේ පිහිටි උඩුවර විහාරස්ථානයේ සිදුකරන ලෙසටද මහේස්ත්‍රාත්වරිය වැඩිදුරටත් නියෝග කළාය.

මෙලෙස දඬුවම් නියම වී ඇත්තේ 77 හැවිරිදි කාන්තාවක්, ඇගේ මිනිබිරියන් දෙදෙනා සහ ඔවුන්ගේ අසල්වැසි ප්‍රදේශයේ පදිංචි තවත් පුද්ගලයකුට බව පොලිසිය අධිකරණයට දැනුම් දී තිබුණි.

පොලිසිය නිවෙස වටලා වැටලීම සිදුකරන අවස්ථාවේදී එහි බූරු ක්‍රීඩාවේ නිරතව සිටි තවත් පිරිසක් පලාගොස් ඇති අතර, එසේ පලායමින් සිටි එක් පුද්ගලයකු අනතුරකට ලක්ව හිසට මැහුම් හතරක් දැමීමට සිදුව ඇති බවද විමර්ශනවලදී අනාවරණය වී ඇතැයි පොලිසිය අධිකරණයට කරුණු වාර්තා කර තිබිණි.