අඩ සියවසක් සපුරණ ගාල්ලේ හබරකඩ ශ්‍රී විජයානන්ද පුරාණ රජමහා විහාර පිරිවෙන හිනිදුම් පත්තුවේ ප්‍රථම පිරිවෙන ලෙස මෙයට 50 වසරකට පෙර ආරම්භකරන ලද ගාල්ලේ හබරකඩ ශ්‍රී විජයානන්ද පුරාණ රජමහා විහාර පිරිවෙන අභිමානවත් ඉතිහාසයකට උරුම කම් පාමින් මෙම මාර්තු 11 වැනිදා  සිය පනස් වැනි සංවත්සරය මහත් ඉහළින් සැමරීමට කටයුතු යොදා ඇත.

ශ්‍රී වික්‍රම රාජසිංහ රජ සමයේ සිට පැවැත එන මෙම පුරාණ රාජමහා විහාරය පළාතේ පැරණි හා සම්භාවනීය විහාරය ලෙස සැලකේ.

ප්‍රදේශයට බලවත් අඩුපාඩුවක් සම්පූර්ණ කරමින් සාමණේර පැවිදි අධ්‍යාපනයටත් , ප්‍රදේශයේ බොහෝ දරු දැරියන්ගේ දහම් දැනුම් වර්ධනයටත් මහඟු පිටිවහලක් වනු  පිණිසත්  පළාත් වාසී කුල දරුවන් කිහිප දෙනෙකුන් මහන කරවා මෙම පැරණි විහාරයේ ශ්‍රී විජයානන්ද පිරිවෙන ආරම්භ කරන ලද්දේ 1963 වසරේ දීය.

එවකට ශ්‍රී විජයානන්ද පුරාණ විහාරාධිපතිව වැඩ විසූ මාවනානේ ශ්‍රී සොණුත්තර මා හිමිපාණන්සේ සකස්කර තිබූ ප්‍රමාණවත් ගොඩනැගිලි වලින් පිරිවෙනක් ආරම්භ කිරීමට අවශ්‍ය මූලික පහසුකම් ප්‍රයෝජනයට ගත්, උන්වහන්සේගේ දීප්තිමත් ශිෂ්‍ය වරයාණන්වූ  වූ රාජකීය පණ්ඩිත මාවනානේ ශ්‍රී පේමානන්ද නායක ස්වාමීන්ද්‍රයන් වහන්සේ මෙම සම්භාවනීය ආයතනයේ නිර්මාතෘවරයාණන් වූහ. එය උන්වහන්සේගේ කාලයක් තිස්සේ සිතේ පැවැති සිහිනයක් යථාර්ථයක් බවට පත්කරවා ගනිමින් බොහෝ දුෂ්කරතා මැද ආරම්භ කළ මෙම ආයතනය උන්වහන්සේගේ අනාගත දැක්මේ ප්‍රඥාවන්ත භාවය  ප්‍රකට කරන විශේෂ ලක්ෂණයක් සේ අගය කළ යුතුය.

ඒ අනුව එවකට ප්‍රධාන පිරිවෙන් පරීක්ෂකව වැඩ විසූ සිය කල්‍යාණ මිත්‍ර ගුරුවරයාණන් කෙනෙකු බඳුවූ රාජකීය පණ්ඩිත අකුරැටියේ අමරවංශ මාහිමිපාණන්වහන්සේගේ  අත් පොත් තැබීමෙන් හා එවකට හිනිදුම පාර්ළිමේන්තු මන්ත්‍රී නීතිඥ හෙන්රි දිසානායක මහතාගේ  පූර්ණ අනුග්‍රහය ලබමින් මෙම ආයතනය ශ්‍රී විජයානන්ද පිරිවෙන නමින් ආරම්භ කරනු ලැබීය.

පළාත් වාසීන් සැමගේ උදව් උපකාර ලබනු පිණිස , විහාරස්ථානයේ ප්‍රධාන දායක ආර්.විජේවන්ත විදානාරච්චි රළහාමිගේ සභාපතිත්වයෙන් හා බී.විජේවන්ත, ඒ විජේවර්ධන මහත්වරුන්ගේ ලේකම් ධූරයෙන් ආරම්භ කළ ප්‍රථම පාරිවේණාරක්ෂක දායක  සභාව එදා මෙදා තුර පිරිවෙනේ පැවැත්මට මහත්ම  පිටුබලයක් වීය.

උන්වහන්සේගේ ප්‍රධාන ශිෂ්‍යවරයානන්වූ වර්තමාන පිරිවෙන් විහාරාධිපති දක්ෂිණ ලංකාවේ ප්‍රධාන අධිකරණ සංඝ නායක හබරකඩ ඉන්ද්‍රරරතන නා හිමියෝ උන්වහන්සේට සෙවනැල්ලක් මෙන් වෙසෙමින්, ආරම්භයේ සිටම ඇතිවූ සියළු අර්බුධ, අභියෝග හා අපහසුකම් ජයග්‍රහණය කරන්නට මහත්ම ශක්තියක් වූහ.

එම මුල් යුගයේ ඇතිවූ ඇතැම් ප්‍රශ්න නිරාකරණය කර ගන්නට එවකට අධ්‍යාපන ඇමැති ඊරියගොල්ල මැතිතුමාගේඅධ්‍යාපන පරිපාලන ලේකම් වරයකු වූ විළියම් කාරියවසම් මහතාගෙන් ( පාර්ළිමේන්තු මන්ත්‍රී අකිල විරාජ් කාරියවසම් මහතාගේ පියා) ලද සහාය කෘතවේදීව සිහිපත් කළ යුතුය.

වසරින් වසර දිනෙන් දින සීග්‍ර දියුණුවකට පත්වූ ශ්‍රී  විජයානන්ද පිරිවෙන,සිසු දරුවන් ගෙන් වඩාත් පරිපූර්ණ වූවා සේම,  අද දක්වාමත් ඊට අවශ්‍ය කළ ආර්ථික ශක්තිය ගොඩනංවාලන්නට එහි නිර්මාතෘවරයාණන් වූ මාවනානේ පේමානන්ද නාහිමියෝ බලවත් දුෂ්කරතා ජය ගනිමින් සියළු කට යුතු සංවිධානය කළේ අප්‍රතහිත ධෛර්යයකිනි.ඒ නිසාම පිරිවෙණ නඩත්තුව සඳහා කුඹුරුයායවල් මෙන් ම තේ වගාවක් ද උන්වහන්සේ ආරම්භකළහ. අවශ්‍ය කරන එළවළු තම ගෙවත්ත තුළම සකස් කරවා ගන්නට උන්වහන්සේ එකළ සමත්වූහ.

ඒ හිනිදුපත්තුවේ හැම ගමකින්ම ශ්‍රද්ධාවෙන් බොහෝ දායකයන් වාර්ෂිකව පිරිනමන දන් පූජාවන්ට අමතරවය.

ඉතාම කරුණාවෙන් මෙන්ම පිය සෙනෙහසින් ද සුවිශාල සිසු දරුවන් රාශියක් ශ්‍රී ලංකාවට පමණක් නොව ලොවටද දායාද කර දෙන්නට තම ආයතනය තුළින් උන්වහන්සේ සමත්වූහ.  

මාවනානේ ශ්‍රී සොනුත්තර සිය ගුරු දේවයාණන්  වහන්සේ ගේ මෙන්ම, තම සරසවි අධ්‍යාපනය සිදු කරන කාලයේ පටන්  මේ සියල්ලටම මහත් පිටිවහළක් ලබා දුන් තම ප්‍රධාන ශිෂ්‍යවරයානන් වු   හබරකඩ ඉන්ද්‍රරතන මා හිමියන්ගේ ද සහය ලබමින්  තමන්ගේම සිසු දරුවන් තිහකට අධික සඟ පිරිසක් බිහි කර වදාළහ.

එම සඟපරපුර විදුහල්පතිවරුන්, ගුරුවරුන්, ධර්මකථිකයන්, දේශකයන්, ලෝක ධර්මප්‍රචාරක හිමිවරුන්ගෙන් ශෝභමාන වූහ.ගිහි සිසු පිරිස අතර පරිපාලන නිලධාරීන්, දිසාපතිවරුන්, විදුහල්පතිවරුන්,  ගුරුවරුන් හා විවිධ තලවල තනතුරු හොබවන්නන් වූහ.

සිසු දරුවන් තැනීම පිළිබඳ උන්වහන්සේට තිබුණු මහා පරිණත වූ කුශලතාවය සසරින් ආ පුරුද්දක් මෙන් ප්‍රභල පරාසයක  පැතිරගිය අසමාන එකක් වීය. උන්වහන්සේගේ සංඝනායක පදවි උපහාර උත්සවයේදී, එකළ පළාත් අධ්‍යාපන අධ්‍යක්ෂවරයෙකුව සිටි සෙනරත් වීරතුංග මහතා සඳහන් කළ පරිද්දෙන්, අපේ නාහිමියෝ  සිසුන් තැනීම  පිළිබඳ " සුවිශේෂී රාමුවක් හා නව ආදර්ශයක් " අපේ ශාසන සම්ප්‍රදාය තුළට එකතු කළ උතුමෙක් වූහ.එය අදටත් ප්‍රයෝගිකවෙයි.  

උන්වහන්සේගේ අපවත් වන තුරුම මෙම ආයතනයේ ආධිපත්‍යය දරණු ලැබූ අතර, එම අවධිය පිරිවෙණේ ස්වර්ණමය යුගය ලෙසින් පිරිවෙණේ ඉතිහාසය තුළ අනුස්මරණීය ලෙස සටහන්ව ඇත.

අදින් 50 වසර සමරණ මෙම මොහොතේ ශ්‍රී විජයානන්ද පිරිවෙණ සියලු විහාරාංග වලින්, සුවිශාල පිරිවෙන් ශාලාවකින්,සම්මුඛ ශාලාවලින්,පුස්තකාල හා පරිගණක අංශවලින් අංග සම්පූර්ණ ආයතනයක්ව පවතී.

ඒ වර්තමාන පිරිවෙන් විහාරාධිපති හබරකඩ ඉන්ද්‍රරතන නාහිමියන්ගේ උත්සාහයේ ප්‍රතිපලයක්  ලෙසිනි. උන්වහන්සේගේ ආරාධනයෙන් හා වර්තමාන දායක සභා සභාපති හිටපු අමාත්‍ය අයි. විජේවන්ත මහතාගේ  අනුග්‍රහයෙන්, හිටපු ජනාධිපතිනී චන්ද්‍රිකා කුමරතුංග මහත්මිය, ජේෂ්ඨ අමාත්‍ය පියසේන ගමගේ,පුනරුත්තාපන අමාත්‍ය ගුණරත්න වීරකෝන්, ජලසම්පාදන අමාත්‍ය දිනේෂ් ගුණවර්ධන, දකුණු පළාත් හිටපු මහ ඇමති ශාන් විජයලාල් සිල්වා යන මැති ඇමතිවරුන්ගේ මෙන්ම , බන්ධුල විජේසේකර මහතා වැනි ප්‍රාදේශීය නායකයන්ගේ ද, උන්වහන්සේට හිතවන්ත ලංකාවේ අගනුවර හා වෙනත් පළාත් වළ දානපතියන්ගේ ද නොමසුරු සහාය මෙම ආයතනයේ අද දියුණුවට ලබා ගැනීමට උන්වහන්සේ සමත් වූහ.

හබරකඩ ශ්‍රී විජයානන්ද පුරාණ රජමහා විහාර පිරිවෙන, තව බොහෝ කලක් සම්බුද්ධ ශාසනයට  මහත් වැඩ දායක සේවාවන් සලසන ආයතනයක් බවට පත්වේවා.