2017 වර්ෂයේදී තිරගත වීමට නියමිත, කොමික් කතා ඇසුරෙන් නිර්මාණය "Justice League" නම් හොලිවුඩ් චිත්‍රපටය අප රටට නෑදෑකමක් කීමට බොහෝ ඉඩකඩ තිබේ. ඒ "Justice League" චිත්‍රපටය සඳහා ශ්‍රී ලාංකික යුවතියක රංගනයෙන් දායක වීම ඊට ප්‍රධාන හේතුවයි. එහි රූගත කිරීම් ආරම්භ කර ඇති අතර, මේ වනවිට ලන්ඩනයේ ජීවත් වන ඇය කලා කටයුතු සම්බන්ධයෙන් කටයුතු කරන අයෙකු බව අප සමගින් පැවසුවාය. ඊට අමරතව ඇය 2016 වර්ෂයේදී The Huntsman: Winter's War  චිත්‍රපටය සඳහාද දායක වී ඇත. ඇය නමින් ශලනි පීරිස්ය. ඇයගේ කලා දිවිය පිළිබඳව කතාබහ කිරීමට අපත් සමග ඇය මෙසේ එකතු වුවාය.

ඔබ ගැන කෙටි හැඳින්වීමක් කළොත්?

මගේ නම ශලනි පීරිස්. මම නුවර උපන් කෙනෙක්. මම දැනට අවුරුදු 07ක් තිස්සේ ලන්ඩනයේ ජීවත් වෙනවා. ඊට අමතරව කලා කටයුතු සඳහා සම්බන්ධ පුද්ගලයෙක් කියලත් කියන්න පුළුවන්.

මුලින්ම චිත්‍රපට පිළිබඳව කතා කළොත්, ඒ සඳහා අවස්ථාව ලැබෙන්නේ කොහොමද?

චිත්‍රපට සඳහා දස්කම් බලන්න පරීක්ෂණ තියෙනවා. ඒ සඳහා මම අයදුම් කරලා. මේ වසරේ මුල් කාලයේ ඒ සඳහා මුහුණ දුන්නා. ඊට පස්සේ තමයි මට අවස්ථාව ලැබුණේ.

අවස්ථාව ලැබීම පිළිබඳව මොකද හිතෙන්නේ?

මුලින්ම කියන්න ඕනේ, මම කොමික් රසිකයෙක් කියලා. ඒ නිසයි මට ඕනෑකම තිබුණේ මේ සඳහා දායක වෙන්න. ඉතිං මේ අවස්ථාව මට ලැබුණා කියලා ඒ අය මට දැන්වූවාම මට ලොකු සතුටක් දැනුණා.

මෙහි චරිතය ගැන යම්කිසි දෙයක් කිව්වොත්?

මේ චරිතය ඉතාමත් ලොකු චරිතයක් නම් නෙමෙයි. නමුත් ඒ දේ මට වටිනවා කියලා කියන්න පුළුවන්. ඉතාමත් රහසිගත විද්‍යාගාරයක් සඳහා ඇතුළු වීමට හැකියාව සහ ඒ සඳහා බලතල තියෙන සෙබළියක්ගේ චරිතයක් සඳහා තමයි මම දායක වෙන්නේ.

ලැබුණු අවස්ථාව පිළිබඳව ආඩම්බරයක් තියෙනවාද?

ගොඩක් ලොකු ආඩම්බරයක් තියෙනවා. රංගනය පිළිබඳව තවත් ඉදිරියට හදාරලා. ඒ මගින් මහන්සි වෙලා. රංගන ශිල්පිනියක් විදිහට සාර්ථක වෙලා ලංකාවේ නම ඉදිරියට ගෙනියන්න බලාපොරොත්තු වෙනවා.

ඩිලාන් ක්‍රිෂාන්ත