ඔස්ට්‍රියාවේ වියානාහී ශ්‍රී ලංකා තානාපති කාර්යාලයේ නියෝජ්‍ය තානාපති ලෙස සේවය කළ චරිත බණ්ඩාර වීරසිංහ මහතා මෙරටට පැමිණ සිටියදී හදිස්සියේ ඇතිවූ හෘදයාබාධයක් හේතුවෙන් මහනුවර ජාතික රෝහලට ඇතුළත් කිරීමෙන් පසු මිය ගියේය.

නිවාඩුවක් ගත කිරීම සඳහා මෙරටට පැමිණි වීරසිංහ මහතා හඟුරන්කෙත කොට්ටල පාරේ පිහිටි සිය නිවසේ සිටියදී හදිසියේ ඇතිවූ හෘදයාබාධයක් හේතුවෙන් මහනුවර ජාතික රෝහලට ඇතුළත් කිරීමෙන් පසුව මෙලෙස ජීවිතක්ෂයට පත්ව තිබේ.

මිය යනවිට හතලිස්පස්වන (45) වියේ පසුවූ වීරසිංහ මහතා හඟුරන්කෙත උඩවත්ත කනිෂ්ඨ විද්‍යාලය හා පොරමඩුල්ල ජාතික පාසලෙන් අධ්‍යාපන ලබා පසුව පේරාදෙණිය විශ්ව විද්‍යාලයට ඇතුලත්ව ඉන් අනතුරුව 2010 වසරේ තානාපති සේවයට එක්ව තිබේ.

මියගිය චරිත බණ්ඩාර මහතා මධ්‍යම පළාත් සභාවේ හිටපු කෘෂිකර්ම අමාත්‍ය ජයරත්න දිසානායක හා හඟුරන්කෙත ප්‍රාදේශීය සභාවේ හිටපු සභාපති රණසිංහ දිසානායක යන මහත්වරුන්ගේ ඥාති පුත්‍රයෙකි.

දේහය පිළිබඳව අවසන් කටයුතු අද (1දා) හඟුරන්කෙත ආදාහනාගාරයේදී සිදු කිරීමට නියමිතය.

(එම්.දසනායක)