මෙවර උසස් පෙළ විභාගයේ ආර්ථික විද්‍යාව ප්‍රශ්න පත්‍රය සම්බන්ධයෙන් විශ්ව විද්‍යාල ආචාර්යවරුන් විසින් බරපතල ගැටලු මතු කර තිබියදී, ඒ සම්බන්ධයෙන් විධිමත් ක්‍රියාමාර්ගයක් ගැනීම වෙනුව සිද්ධිය යට ගැසීමේ වෑයමක බලධාරීන් නිරත වෙතියි ලංකා ගුරු සංගමය නිවේදනයක් නිකුත් කරමින් කියයි.

එහි ලේකම් ජෝසප් ස්ටාලින් මහතාගේ   නිවේදනයේ මෙසේ ද දැක්වේ.

‘ආර්ථික විද්‍යාව පළමු ප්‍රශ්න පත්‍රයේ ප්‍රශ්න පහක මෙන් ම දෙවන ප්‍රශ්න පත්‍රයේ අනු කොටස් දෙකක දෝෂ පැවතීම මෙන් ම ප්‍රශ්න පත්‍රය විසින් සමස්ත විෂය කරුණු ආවරණය නො කිරීම හා  සමතුලිතභාවයක් නොමැති වීම ඇතුළු ගැටලු ගණනාවක් ගැන විශ්ව විද්‍යාල ආචාර්යවරුන් විසින් කරුණු දක්වන ලදී.

ඒ සමගම, ප්‍රශ්න පත්‍ර සැකසුම් මණ්ඩලයේ නිවේදනයක්  ද සමග විභාග කොමසාරිස්ව  මාධ්‍යයට පැවසුවේ ගැටලුවක් නොමැති බවයි.  එසේම, මේ වනවිට කරගෙන යමින් සිටින බුද්ධිමතුන් හා ගුරු සංගම් විවේචනය කිරීමේ ක්‍රියාවලිය නවතා වහා ම ප්‍රශ්නය කෙරෙහි අවධානය යොමු කරන ලෙස අපි අධ්‍යාපන ඇමතිවරයාගෙන් ඉල්ලා සිටිමු.

 නිලධාරීන් විසින් සැකසීමට යන වාර්තාව වෙනුවට විෂය ප්‍රවීණත්වය ඇති පිළිගත් බුද්ධිමතුන්ගෙන් සමන්විත ස්වාධීන මණ්ඩලයක් වෙතින් උසස් පෙළ ආර්ථික විද්‍යා ප්‍රශ්න පත්‍ර පිළිබඳ වාර්තාවක් ලබා ගන්නා ලෙස ද, ප්‍රශ්නයට මුහුණ දී සිටින සිසුන්ට සාධාරණය ඉෂ්ට කිරීම සඳහා අවශ්‍ය ක්‍රියාමාර්ග ගන්නට අදාළ බලධාරීන්ට නියෝග කරන ලෙස ද අපි ජනාධිපතිවරයාගෙන් ඉල්ලා සිටිමු. ‘