ඉන්දියාවේ කේරළ ප්‍රාන්තයෙන් පළමු වරට හඳුනාගත් ‘ජේ.එන්.1’ නමැති නව කොරෝනා වයිරස ප්‍රභේදය සම්බන්ධයෙන් විමසිල්ලෙන් සිටිය යුතු යැයි ලෝක සෞඛ්‍ය සංවිධානය පවසයි.

මේ වනවිට කේරළ ප්‍රාන්තයේ පමණක් නොව, සිංගප්පූරුවේ ද ‘කොවිඞ් 19’ ආසාදිතයන්ගේ වැඩිවීමක් පෙනනුම් කරන්නේ මෙම ‘ජේ.එන්.1’ වයිරසය ව්‍යාප්ත වන බැවිනි.

‘ජේ.එන්.1’ යනු ‘කොවිඞ් 19 ඔමික්‍රෝන්’ වයිරස ප්‍රභේදයේ ‘බී.ඒ.2.86’ නමැති උප ප්‍රභේදය විකෘති වී නිර්මාණය වූ ඉතාමත් වේගයෙන් ව්‍යාප්ත වන ආකාරයේ වයිරසයකි.

‘බය වෙන්න හේතුවක් නැහැ. කලබල වීමක් අවශ්‍ය නැහැ. ජේ.එන්.1 වයිරසය වේගයෙන් ව්‍යාප්ත වෙනවා. මෙම වයිරසය මහජන සෞඛ්‍යයට තර්ජනයක් වෙලා. ඒ ගැන අවධානයෙන් පසුවීම වැදගත්. මුව ආවරණ පැලඳීම සහ යහපත් සෞඛ්‍ය පුරුදු දිගටම පවත්වාගෙන යෑම මගින් මෙයින් ආරක්ෂා විය හැකියි’ යැයි ලෝක සෞඛ්‍ය සංවිධානය පැහැදිලි කර තිබේ.

මේ වනවිට ඇමෙරිකාවේ ද ‘කොවිඞ් 19’ ආසාදිතයන්ගේ වැඩිවීමක් දකින්න ලැබේ. ඊට හේතුව ද ‘ජේ.එන්.1’ වයිරස ප්‍රභේදය යැයි එරට ‘වසංගත රෝග පාලනය සහ ව්‍යාප්තිය වැළැක්වීමේ මධ්‍යස්ථානය’ පවසා ඇත.