පේරාදෙණිය  ශික්‍ෂණ රෝහලේ නොමේරු ළදරු ඒකකය නොමේරු ලෙස පවතින බවත්  එම ඒකකය සංවර්ධනය කර ජාත්‍යන්තර තලයට ගෙන යා යුතු බවත් ප්‍රසව හා නාරි වෛද්‍ය විශේඥ වෛද්‍ය  කපිල ගුණවර්ධන මහතා ප්‍රකාශ  කරයි.

1984 ආරම්භ කරන ලද මෙම නොමේරු ළදරු ඒකකය මේ වන විට  ඉඩකඩ පහසුකම් ප්‍ර‍මාණවත් නොවීමෙන් මහත් දුෂ්කරතාවයට පත්ව ඇත. මෙම රෝහලේ වර්ෂයකට දරු උපත් දස දහසක් , එකොලොස් දහසක් අතර පමණ සිදුවන බවත්  එයින් සියකට පහළොවක්  නොමේරු ළදරුවන් වන බවත් කියති. වෙනත් රෝහල් වලින් ද  නොමේරු ළදරුවන් මෙම ඒකකයට යොමු කරන බවත් දරුවන්  දෙදෙනෙකු   සිටිය යුතු තැන දහ දොළොස් දෙනෙකු සිටින බවත් ළමා රෝග පිළිබඳ විශේෂඥ වෛද්‍ය සන්ධ්‍යා බණ්ඩාර මහත්මිය කියන්නීය.

නොමේරු දරුවකු ඉපදී මාස දෙකක තුනක් යන තුරු මව රෝහලේ රැදී සිටිය යුතු බැවින් ඇයට නැවතී සිටීමට පහසුකම් ද නොමැති අතර  දරුවකු ඉපදුණු පසු මවට ඇති වන ආතතිය සඳහා වෙනම ප්‍රතිකාර කිරීමට සිදු වී තිබෙන බවත් පැවසේ. නොමේරු ළදරු ඒකකයේ වෛද්‍ය කණ්ඩායමට වැසිකිලි පහසුකම්වත් නැත.

සෞඛ්‍යය අමාත්‍යංශයෙන්  අවශ්‍ය උපකරණ සහ බෙහෙත් අඩුපාඩුවකින් තොරව සැපයෙයි. ඉඩ පහසුකම් වැඩි කර ගැනීම සඳහා  ගොඩනැගිලි සැලසුම් හා ඇස්තමේන්තු  රෝහල් අධ්‍යක්ෂවරයා විසින් අනුමත කර මුදල් ද වෙන් කර  වර්ෂයකටත් වඩා ගත වි ඇතත් ඉදිකිරිම්  ප්‍රමාද   බව  දැනගන්නට ඇත.

නොමේරු ළදරු ඒකකය අසල බල්ලන් ද ගැවසෙන බවත් කියති.