ජනප්‍රිය ගායක වින්සන්ට් ද පෝල් මහතා අභාවප්‍රාප්ත විය. මිය යන විට ඒ මහතා 92 වැනි වියේ පසු විය. ඔහු හත් දරු පියෙකි.

සිරිපාදේ සමනළ කන්ද පෙනේ , බයිසිකලේ බයිසිකලේ දුප්පත් අපගේ බයිසිකලේ, පොසොන් සඳේ, පෙම්බර මෑණියනේ, කමලා කමලා ආදී ගීත ද ඔහු ගැයූ ගිත අතරට අයත්ය.

ඉංග්‍රීසි සිංහල දෙබසින්ම ගී ගැයීමේ හැකියාව තිබූ ඔහු ධනවත් පවුලක උපන්නේය. මවුන්ට් බැට්න් සාමි වරයා ඉදිරියේ ද ගී ගයා ඇත.

බ්‍රිතාන්‍ය පාලන සමයේ රුපියල් ලක්ෂයක වත්කමක් ඔහුගේ පියාට තිබූ බව කියති.ඒ අනුව ඔහු ඉපදී ඇත්තේ ලක්ෂෙට කොඩිය දැමූ නිවසකය.

ඔහු වාදනය ඉගෙන ගත්තේ තනිවමය. ඔහුට මෙන්ම ඔහුගේ සහෝදරයන් දෙදෙනාටත්, සහෝදරියටත් ගී ගැයීමේ හැකියාව තිබිණි.

1940 දෙවැනි ලෝක යුද සමයේ කොළඹ පාසල් ද වැසිණි. මෝදර පදිංචිවී සිටි ඔහුගේ මව්පියෝ ගම්පහ පදිංචියට ගියහ. මුලින්ම ඔහු ගෙදරට හොරෙන් ප්‍රසංගවලට සහභාගී විය. මව ඔහුට ඒ සඳහා සහාය දුන්නාය.

යුද සමයේ වේදිකාවේ ජනප්‍රිය ගායකයකු වූ ඔහුට නොකඩවාම අත්පොලසන් නාදයත්, සල්ලිත් ලැබිණි. ප්‍රේක්ෂකයෝ සල්ලි කොල හා කාසි වේදිකාවට විසි කළහ.

1947 දී ඔහු ගුවන්විදුලියට එක් විය.

ඔහු පෙම්ගී දෙ තුනකට වඩා ගායනා නොකළේය. ඊට හේතුව ඔහුගේ බිරිය නොකමැති වීමයි. ඔහු නළුවෙක් ද වෙයි. ගම්බද සුන්දරි චිත්‍රපටයේ මුලින්ම රඟපෑවේය.

තම දරුවන් කලා ක්ෂේත්‍රයට යොමු නොකළ බවත්, ඊට හේතුව කලාවට පිවිසීමෙන් දුක් විඳීමට සිදුවීම බවත් ඔහු වරක් කියා තිබිණි.