(බී.ජී. චතුරංග) 

යාපනය බලා විනෝද චාරිකාව යෙදෙමින් සිටි පිරිසක් රැගත්  වෑන් රථයක් පාරෙන් ඉවතට ගමන් කර සිදු වූ අනතුරකින් බස් නැවතුම්පල  රැදී සිටි පුද්ගලයෙකු අද (24) ජීවිතක්ෂයට පත්ව තවත් පුද්ගලයන් 10 දෙනෙකු තුවාල ලබා ඇති බව මිහින්තලේ පොලිසිය පවසයි.

එම අනතුරින් මෙලෙස ජීවිතක්ෂයට පත්ව ඇත්තේ කෑදෑව, කල්ලංචිය ප්‍රදේශයේ පදිංචි ඩී.ඒ. සඳුන් දිනෙෂ් ජයකොඩි නැමැති  38 හැවිරිදි පුද්ගලයෙකි.

ගම්පහ ප්‍රදේශයේ පදිංචි  පිරිසක් විනෝද චාරිකාවක් සඳහා යාපනය දක්වා ගමන් කරමින් සිටියදී, ඔවුන්  ගමන් ගත් වෑන් රථය අද (24දා) අනුරාධපුර - රඹෑව වැලිඔය හන්දිය අසලදී   බස් නැවතුම්පලක රැඳී සිටි අයෙකු අනතුරට පත්කරමින් මාර්ගයෙන් ඉවතට ගමන්කර මෙම අනතුර සිදුව තිබූ බව පොලිසිය කියයි.

මෙලෙස ජීවිතක්ෂයට පත්ව ඇත්තේ කොළඹ බලා ගමන් කිරීම සඳහා රථයක් පැමිණෙන තුරු එම බස්නැවතුම් පලේ රැඳී  සිටි පුද්ගලයෙකි.

අනතුර සිදු වන අවස්ථාවේ පුද්ගලයන් දස දෙනෙකු වෑන් රථයේ ගමන් කර ඇති අතර අනතුරින්  තුවාල ලබූ එම පුද්ගලයන් 10 දෙනා  ප්‍රතිකාර සඳහා   අනුරාධපුර ශික්ෂණ රෝහලට ඇතුලත් කල බවද පොලිසිය සදහන් කලේය.