අහස උසට ඇති කඳු පිළිබඳව භූගෝල විද්‍යාව පාඩමේදී ඉගෙන ගෙන ඇති මේ රටේ ජනතාව අද සාකච්ඡා කරනුයේ අහස උසට ඉදි කෙරෙන ගොඩනැගිලි පිළිබඳවයි. මේ රටේ උසම ගොඩනැගිල්ල වශයෙන් අසූව දශකය දක්වාම හඳුන්වනු ලැබුවේ කොළඹ කොටුවේ පිහිටි ”ආකාස කඬේ” යනුවෙන් හැඳින්වෙන ආපනශාලාව පිහිටි සෙලින්කෝ ගොඩනැගිල්ලයි. විදුලි බලයෙන් කි‍්‍රයා කරන දිවයිනේ ප‍්‍රථම ”දුවන පඩිපෙළ” පැවැතියේද මෙම ගොඩනැගිල්ලේය. එහෙත් අද වනවිට මේ ගොඩනැගිල්ල අභිභවා තවත් ගොඩනැගිලි රාශියක් ඉදිකර ඇත. තට්ටු 35කින් යුතු ලෝක වෙළෙඳ මධ්‍යස්ථානය එක් ගොඩනැගිල්ලකි. අනාගතයේදී මෙම ගොඩනැගිලි අභිභවා තවත් උස ගොඩනැගිලි කොළඹ නගරයේ ඉදිවනු ඇත. ඒ සඳහා දැනටමත් නාගරික සංවර්ධන අධිකාරිය හා අමාත්‍ය මණ්ඩලයේ ද අනුමැතිය ලැබී ඇති බව වාර්තාවේ. එයින් පළමුවැන්න කොළඹ ට‍්‍රාන්ස්වර්ක්ස් මන්දිරය මූලික කරගෙන ඉදිකිරීමට නියමිත Krrish luxury lifestyles කුලූනු සංකීරණයයි. වර්ෂ 1983 දී ආරම්භවී ඇති කි‍්‍රස් ගෲප් ආයතනය ඉන්දියාවේ බෙහෙවින් ඉහළ පෙළේ ආයතනයක් වන අතර අහස උසට ගොඩනැගිලි ඉදිකිරීම හා කෝබ‍්‍රා බියර් නිෂ්පාදනය ඔවුන්ගේ ප‍්‍රධාන ව්‍යාපාර වී ඇත. කොළඹ ලෝටස් පාර, යෝක් වීදිය සහ චැතම් වීදිය මධ්‍යගතව පිහිටි කොළඹ ට‍්‍රාන්ස්වර්ක්ස් ගොඩනැගිල්ල හා ඒ වටා අක්කර 4ක භූමිය මෙම සමාගම මගින් මිලදී ගෙන ඇත. පර්චසයක් ලක්ෂ 80 ක මිලකට මෙම ඉඩම පවරාදී තිබෙන බව වාර්තාවේ. බි‍්‍රතාන්‍ය ගෘහ නිර්මාණ ශිල්පයට අනුව ඉදිකර තිබෙන ට‍්‍රාන්ස්වර්ක්ස් ගොඩනැගිල්ල නඩත්තු කරමින් එහි ස්වරූපයට හානි නොවන ආකාරයට මෙම ඉදිකිරීම් සිදු කිරීම සඳහා අදාළ ආයතනය නාගරික සංවර්ධන අධිකාරියට එකඟතාවය දක්වා ඇත. මහල් 95කින් සමන්විත එක් කුලූනක් තරු හතේ හෝටලයක් හා කාර්යාල පහසුකම්වලින් සමන්විතය. පළමුවැනි මහලේ සිට දහවැනි මහල දක්වා රථවාහන ගාල් කිරීමේ පහසුකම්වලින් යුක්තය. අනෙකුත් කුලූනු මහල් නිවාස සඳහාය. තරු හතේ හෝටලයට උත්සවශාලා, අහස් උයන (Sky Garden)  කී‍්‍රඩා ශාලා, පිහිණුම් තටාක, ළමා පිහිණුම් තටාක, ශරීර සුවතා මධ්‍යස්ථාන, යෝග මධ්‍යස්ථාන, ජ්‍යෙෂ්ඨ පුරවැසියන් සඳහා වූ විශේෂ ස්ථාන, මල් වත්තක්, සමාජ ශාලා ඇතුළු අති නවීන පහසුකම්වලින් යුතු මෙම තරු හතේ හෝටලය ඇතුළු සියලූ කුලූනු භූ කම්පනවලට ඔරොත්තු දෙන ආකාරයට ඉදිකරනු ලබන බව සඳහන්වේ. මෙහි උසම කුලූන මහල් 85කින් යුක්තය. සියලූ පහසුකම්වලින් යුතු මෙම මහල් නිවාස විශාල මිල ගණන්වලින් යුතුය. වර්ග අඩි 2900 ක බිමක මහල් නිවසක වටිනාකම රුපියල් 9,39,60,000 (නවකෝටි තිස් නව ලක්ෂ හැට දහස) සිට රුපියල් 13,34,00,000 (දහතුන් කෝටි තිස් හතර ලක්ෂයක්) දක්වා වේ. වර්ග අඩි 3450 ක මහල් නිවසක වටිනාකම රුපියල් 11,17,80,000 (එකොළොස් කෝටි දාහත් ලක්ෂ අසූදහසක්) සිට රුපියල් 15,87,00,000 (පහළොස් කෝටි අසූහත් ලක්ෂයක්) වේ. වර්ග අඩි 4000 ක මහල් නිවාසයක මිල රුපියල් 12,96,00,000 (දොළොස්කෝටි අනූහය ලක්ෂය) සිට රුපියල් 18,40,00,000 (දහඅට කෝටි හතළිස් ලක්ෂයක්) දක්වා වේ. අනාගතයේ අහස සිප ගන්නා උසම ගොඩනැගිල්ල මෙය වනු ඇත. කොම්පඤ්ඤවීදියේ ශ්‍රීමත් ජේම්ස් පීරිස් මාවතට මායිම්ව කොළඹ කොමර්ෂල් කොම්පැනිය පිහිටා තිබූ අක්කර දෙකක භූමියේ මහල් 68කින් යුතු නිවාස ගොඩනැගිල්ලක් ඉදිකිරීමට ආයෝජන මණ්ඩලයේ අනුමැතිය ලබාදී ඇත. පර්චසය ලක්ෂ 80ක මිලකට ඉන්දියාවේ ටාටා සමාගමට මෙම ඉඩම පවරා ඇත. මෙම නිවසක මිල ගණන් පිළිබඳව මෙතෙක් අවසන් තීන්දුවකට එළඹී නැති බව ”ඉරිදා ලංකාදීපය” කළ සොයා බැලීමේදී අනාවරණය විය. විදේශිකයන් ඉලක්ක කර ගෙන මෙම මහල් නිවාස ඉදිකිරීමට නියමිතව ඇත. බේරේ වැව ඉදිරිපිට සුන්දර පරිසරයක පිහිටි මෙම භූමියේ ගොඩනැගිලි ඉදිකිරීම් කටයුතු ලබන වසරේ ආරම්භ කිරීමට නියමිතය. මෙම ගොඩනැගිල්ලේ විශේෂත්වය වශයෙන් සඳහන් වන්නේ හෙළිකොප්ටර් අංගනයක් පිහිටුවීමයි. මහල් 40කින් සමන්විත හයට් රීජන්සි හෝටලය ගාලූ මුවදොරදී පිහිටුවීමට මේ වනවිටත් ගිවිසුම් අත්සන් කර ඇත. මෙම හෝටලයේ කළමනාකරණය හා මෙහෙයුම් කටයුතු සඳහා ඇමෙරිකා එක්සත් ජනපදයේ හයට් හොටෙල්ස් කෝපරේෂන් සමාගම මූලිකවී සිටියි.ආයෝජන මණ්ඩලයේ අනුමැතියෙන් ඉදි කෙරෙන මෙම තට්ටු නිවාසවලට අමතරව පෞද්ගලික අංශය මගින්ද තවත් මහල් නිවාස දෙකක් කොළඹ බෞද්ධාලෝක මාවතේ හා කොල්ලූපිටියේ ඉදිකිරීමට නියමිතව ඇත. කොළඹ බෞද්ධාලෝක මාවතේ නිවාස 174 කින් සමන්විත මහල් 38කින් හා 42 කින් යුතු ගොඩනැගිලි දෙකක් හා කොළඹ කොල්ලූපිටියේ නිවාස 350 කින් සමන්විත මහල් 47 ක ගොඩනැගිල්ලක් ඉදිකිරීමට නියමිතය. (ඡායාරූප අනුග‍්‍රහය - දිනපතා ලංකාදීප පුවත්පත)

දයාසීලී ලියනගේ