1   

 

හෝලි කියන්නේ ඉන්දියාවේ ජනප‍්‍රිය චාරිත‍්‍රයක්. පාට පාට කුඩු වලින් බාල තරුණ මහලූ සියලූ දෙනා වර්ණ ගැන්වෙනවා. ඉන් ඔවුන් බොහෝ විනෝද වෙනවා. අද හෝලි සැණකෙළිය ලංකාවටත් ඇවිල්ලා. ලංකාවේ තරුණ තරුණියනුත් හෝලිවලින් විනෝද වීමට යනවා.

 

5
විශේෂයෙන්ම සාමාන්‍ය පෙළ, උසස් පෙළ විභාගවලට පෙනී සිටි තරුණ තරුණියන් ලංකාවේ හෝලිවල ඉලක්කයවී සිටිනවා.


ඒ නිසාම ලාංකීය සංස්කෘතියට අදාළ නොවන ඒත් ලංකාවේ ජනප‍්‍රිය කිරීමට වෙහෙසෙන හෝලි පිළිබඳ මා සොයා බැලූවා. එහිදී අන්තර් ජාලයේ තිබෙන මෙවැනි දැන්වීමක් දුටුවා. එහි සඳහන් වෙලා තිබුණේ මේ වගේ දෙයක්.


”ලංකාවේ සාමාන්‍ය පෙළ උසස් පෙළ අවසන් කළ තරුණ තරුණියන් ඉලක්ක කර ගනිමින් හෝලි ව්‍යසනයක් පැමිණ තිබෙනවා.


මේ හෝලි සැණකෙළිය පිළිබඳ මිතුරන් දැනුවත් කරන්නේ ෆේ්්ස්බුක් මාර්ගයෙන්. ටිකට් එකක් රුපියල් 500යි. රු. 500ක් දීලා ටිකට් අරගෙන පෙම්වතුන් ලෙස හෝ තනි තනි වශයෙන් තරුණ තරුණියන් හෝලි සැණකෙළියට සහභාගි වෙනවා. පාට කුඩුවලින් ක‍්‍රීඩා කරන අතරතුරේ තරුණියන්ට නොයෙකුත් අපහසුතාවයන්ටත් ලක්වෙන්න සිද්ධ වෙනවා. ඒත් හෝලි ක‍්‍රීඩාවක් නිසා ඒ හැම අපහසුතාවයක්ම විඳ දරාගෙන ඉන්න තරුණියන්ට සිදුවෙනවා”


 ඇත්තටම එම ප‍්‍රකාශයේ සඳහන්ව තිබුණේ තරුණියන්ගේ සදාචාරය ගිලිහිලා යන ආකාරයයි. ඒත් ඊට එහායින් ගිය දේවලූත් එතන සිදු වෙනවා. ලැබුණ ආරංචියේ හැටියට නම් ටිකට් අරගෙන ඇතුල් කළ පසු ක‍්‍රීඩකයන් ගැන කිසිම අධීක්ෂණයක් සිදු වෙන්නේ නැහැ. ඒ වගේම එතන තව තවත් ජාවාරම් සිදු වෙනවා.


ඒ පිළිබඳ ඊට සම්බන්ධ එක් තරුණයෙක් කිව්වේ මේ වගේ කතාවක්.

3
ගොඩක් පිරිමි ළමයි විනෝදෙට හෝලි සෙල්ලම් කරන්න යන්නේ. සමහර කොල්ලෝ කණ්ඩායම් හැදිලත් එනවා. ටිකට් අරගෙන ඇතුළට ගියාම මොනවද කරන්නේ කියලා බලන්න කවුරුත් එන්නේ නැහැ.


එතෙන්ට කුඩු ගංජා විකුණන අයත් එනවා. සමහර ළමයි ඒවට පුරුදු කාරයෝ. එයාලා හෝලි සෙල්ලම් කරන ගමන් එතනට ගිහින් ඒවත් ගන්නවා. ඒ වගේම ඒ යන අය අලූතෙන් කවුරුහරි එක්කරගෙන යන්නත් අමතක කරන්නේ නෑ. සමහර වෙලාවට රණ්ඩුවෙන අවස්ථාත් තියෙනවා. ඒත් පොලිසි යන්න තරම් දුරදිග යන්නේ නෑ. අපිත් පොඩි ෆන් එකක් අරගෙන එනවා”


අද තාරුණ්‍ය ගමන් ගන්නේ කොහාටද?
සැබැවින්ම ඛේදවාචකයකි. ඔවුන් කාගේ හෝ දියණිවරුය, කාගේ හෝ සොයුරියන්ය, නැතිනම් කාගේ හෝ පුතණුවන්ය. කාගේ හෝ සොයුරන්ය.
රටේ අනාගතය භාර ගැනීමට සිටින මෙවැන්නන් කුඩු ගංජා අතර අතරමංව උන්මත්තකයින් ලෙස සොයා යන්නේ කුමන සතුටක්ද?


පසුගිය ජනවාරි 17 වැනි සෙනසුරාදා ද මීගමු වෙරළේ මෙවැනිම හෝලි සැණකෙළියක් පවත්වා ඇත. ඒ පිළිබඳව කළ විමසුමකදී ඊට සම්බන්ධ වූ තවත් තරුණයකු පැවසුවේ මෙවැනි දෙයකි.

2


”ගිය සැරේ වාගෙම පොඩි ජොලියක් ගත්තා. ටිකට් එකක් රු. 500යි. හොඳට විනෝද වුණා. ආයේ ජනවාරි 24 කොළඹ තවත් හෝලි සැණකෙළියක් තියෙනවා.


මම ඔහුගෙන් මේ සැරෙත් කුඩු ගංජා වගේ දේවල් විකිණුනාද කියලා ඇහුවා. ඔහු හිස දෙපසට වනලා සිනාසුනා.


ඇත්තටම මෙවන් හෝලි සැණකෙලි ලාංකීය සමාජයට අත්‍යවශ්‍යද? මුළු දවසේම සිය ශ‍්‍රමය කැප කරමින් මව්පියන් උපයනා වැටුපෙන් දරුවන්ට මෙවැනි සැණකෙළිවලට සහභාගිවී සැබෑ සතුටක් ලබා ගත හැකිවේද? ශාක්ෂරතාවයෙන් ඉහළ පිරිසක් සිටින මෙවන් සමාජයක සංස්කෘතිය, හැදියාව සංවේදී බව පහව යමින් මෙවැනි සිහින ලෝක නිර්මාණයවීම සැබැවින්ම සෝචනීය තත්ත්වයකි.


වගකිවයුතු සමාජය අනාගත භාරකරුවන් මංමුලා කරන මෙවැනි දේ පිළිබඳව සොයා බැලීම කාලීන අවශ්‍යතාවයක් බව පසක් කරමි. 

 

sg