අහස් ගැබේ නිල් තරු කැට එකින් එක මෝදු වෙමින් තිබිණි. කිසිම කිසිවක් නැති නිසල අවකාශය තිබුණේ උඩින් නිල් අහසත් යටින් සයුරත් පමණකි. පස්වරු 7ට රෝමය අසබඩ ‘සිවිටාවෙඩියා’ වරායෙන් පිටත් වූ ”කොස්වා කොන්කෝඩියා” නෞකාව මධ්‍යධරණි මුහුද ඔස්සේ යාත‍්‍රා කරමින් තිබිණි. සුන්දර නිවාඩුවක් අපේක්‍ෂාකරන තුන් දහස් දෙසිය හයක් වන සංචාරක පිරිසකුත් කාර්ය මණ්ඩලයට අයත් එක්දහස් විසි තුන් දෙනෙකුත් මේ නෞකාවේ ගමන් කරමින් සිටියහ. ඔවුන්ගෙන් වැඩි පිරිස ඉතාලි ජාතිකයන් වූ අතර ප‍්‍රංශ ජර්මන් සභා ස්පාඤ්ඤ ජාතික සංචාරක ඔවුන්නොවුන්ගේ භාෂාවන්ගෙන් රාත‍්‍රී අහසේ චමත්කාරය ගැන දොඩමළු වූහ. සමහරු නැව් අංගන මත සිටියත් තවත් පරිසක් සිටියේ අවන්හල්වලය. වැඩි දෙනෙක් සිටියේ රාත‍්‍රි භෝජනයට සූදානම් වෙමිනි. කානිවල් සමාගමට අයත් වූ කොස්වා කොන්කෝඩිය නෞකාව වූ කලී ඉතාලියට අයත් විශාලතම මගී නෞකාවලින් එකකි. ලෝක මගී නෞකාව වූ කලී ඉතාලියට අයත් විශාලතම මගී නෞකාවලින් එකකි. ලෝක මගී නෞකා ලැයිස්තුවේ දහතුන් වැනි විශාලතම නෞකාව වූ මෙය දිගින් අඩි 952 ක් විය. තට්ටු 17 සහිත මෙහි මගීන් 3700 ටද ගමන් කළ හැකි විය. 2006 ජූලි මාසයේදී සිය මංගල ගමන ඇරඹූ කෝස්වා කොන්කෝඩියා නැව 2008 වසරේ නොවැම්බර් 22 දා දැඩි සුළඟකට අසුව පැමාමෝ වරායේ ජැටියක හැප්පිණි. ඉන් වූ ”තුවාල” වලට වහාම පිළියම් කෙරුණු අතර ඉක්මනින්ම යළිත් මුහුදු ගමන් ආරම්භ කළේය. 2012 ජනවාරි 13 කොන්කෝඩියා නෞකාව බාරගෙන දැනට වසර දහයකි. ඒ දස වස පුරා ඔහු මධ්‍යධරණී මුහුද ඔස්සේ මගීන් දස දහස් ගණනක් රැගෙන ගියේය. ඔහු නේපල්ස් හි පිහිටි සිය නිවෙසට ඇමතුමක් ගත්තේය. අම්මා රෝස් කතා කළාය. අම්මා මම දැන් ඉන්නෙ ගිගිලියෝ දූපතට කිට්ටුවෙන්. අද පුදුම විදිහට සීතල දවසක්. මෙය සත් දින ගමනකි. මාර්ෂෙල් සහ බාසිලෝනා වරායවල නතර කර තැබීමටද නියමිත වන මේ සංචාරයට එක්ව සිටි වැඩිදෙනෙක් තම නිවාඩුව ප‍්‍රිතියෙන් ගතකිරීමට පැමිණියවුන්ය. රාත‍්‍රි අඳුර කෙමෙන් මෝරා එමින් තිබිණි. මුහුදු සුළඟ වඩාත් සීතලට හමා ගියේය. දැඩි අඳුර නිසාදෝ ඈත විශ්වයේ වූ දසදහසක් තරු කැටවල දීප්තිය තරමක් වැඩිය. පරිසරයට පෙම් බැඳි සංචාරකයෙක් අහස දෙස බලා සිටි නමුත් වැඩිදෙනෙක් සිටියේ අවන්හල්වල හා ඔවුනොවුන්ට අයත් කාමරවලය. නෞකාවේ ඒ ඒ තට්ටුවල අවන්හල් 17කුත් බොජුන් හල් 17කුත් විය. මේ හැම ශාලාවක්ම පිරී තිබිණි. වේලාව පස්වරු 8.35 මෙතෙක් වේලා දකින්නට තිබුණේ නිල් අහසත් මහ මුහුදත් පමණකි. එහෙත් එක් වරම ගොඩබිමක දර්ශනය සංචාරකයන්ගේ නෙත් සිත් පැහැර ගත්තේය. ඒ ගිග්ලියෝ නම් වන දූපතට අයත් සමුද්‍ර ස්වභාවික රක්‍ෂිතයයි. වේලාව රාත‍්‍රි 9.30 නෞකාව සේන්දු වන්නේ ගිග්ලියෝ දූපතට මීටර් 300 ක් තරම් ඔබ්බෙනි. එක්වරම ඇසුණේත් දැනුණේත් දැඩි කම්පනයක් සහ තියුණු හඩකි. නැව යම් කිසිවක ගැටුණු බව නියමුවාට සිතිණි. වේලාව රාත‍්‍රී 9.35 නෞකාව අඳුරෙහි ගිලිණි. එහි විදුලිය සැපයුම කිසියම් හේතුවක් නිසා අඩාල වූ නිසාය. බොහෝ සංචාරකයෝ උන් හිටි තැන් වලින් නැගිට්ටාහ. වේලාව රාත‍්‍රී 9.45 අනතුරු හඟවන නලාහඬ නිකුත් විය. දිගු ඛණ්ඩ දෙකකින් සහ කෙටි ඛණ්ඩයකින් සමන්විත වූ මේ නලා හඬ නාවික කාර්ය මණ්ඩලයට කියන්නේ නෞකාව කිසියම් ගැටලූවකට මුහුණ දී ඇති බවයි. වේලාව රාත‍්‍රී 9.50 නැවෙන් නැගුණු අනතුරු හැඟවීමේ නලා හඬින් බය භිරාන්තව සිටි සංචාරකයෝ එකිනෙකාගේ මුහුණ බැලූහ. මොකද වුණේ. මිනිස්සු එකිනෙකාගෙන් අසා ගත්හ. බොජුන් හල් මේස මත වූ ආහාර බඳුන් සහ පිඟන් බිම වැටුණේ සංචාරකයන්ගේ සිරුරු පවා ඉඳුල් වලින් නහවමිනි. කලබල වූ සංචාරකයෝ තම තමන්ගේ කාමර කරා දිව ගියේ ආරක්‍ෂිත කබා පැළඳ ගැනීම පිණිසය. ආරක්‍ෂිත කබාවලින් සැරසුණු සංචාරකයනට පුංචි තිරයෙන් දුටු ටයිටැනික් චිත‍්‍රපටය සිහියට නැගීය. ලේකයේ වඩාත්ම ආන්දෝලනාත්මක නෞකා විනාශය වූයේ ටයිටැනික්ය. ගීතයට චිත‍්‍රපටයට නවකතාවට නැගුණ ටයිටැනික් සිද්ධිය ලෝකවාසීන්ගේ දෙනෙත් අග කඳුළු පුරවාලන්නට සමත් වූවකි. එකී බිහිසුණු නෞකා විනාශය සිදුවී දැන් සියවසකට කිට්ටුය. ටයිටැනික් සියවස සමරනු වස් තවත් එවැනිම විනාශයක් සිදුවේ යැයි කිසිවෙක් සිතුවේ නැත. වේලාව රාත‍්‍රි 10 යි. ඇතැම් සංචාරකයෙක් හතරවැනි තට්ටුව කරා දිවගියේය. ජීවිතාරක්‍ෂක බෝට්ටු රඳවා තිබුණේ මේ හතරවැනි තට්ටුවෙහි වන නිසාය. මේ අතර නැවේ කපිතාන් උත්සාහ කරමින් සිටියේ නැව ගිලීයාමෙන් වලක්වා ගැනීමටය. ගිග්ලියෝ වෙරළ කරා රැගෙන ගියහොත් නැවට ගිලීයන්නට ඉඩක් නැත. සර්චෙට්ටිනෝ සිය මවට යළිත් ඇමතුමක් ගත්තේය. නැව වැලිකන්දක හැපුණා. ඒත් හැමදෙයක්ම සංසුන්ව සිද්ධවෙනවා. මං හදන්නේ මගීන් බේරාගන්නයි. මට ආයේ කතාකරන්න බැරිවුණොත් අම්මා කලබල වෙන්න එපා. වේලාව රාත‍්‍රි 10.10 කෙටි ඛණ්ඩ හතක් සහ දිගු ඛණ්ඩයකින් යුත් නලා හඬ ඇසිණි. එම සංඥාවේ අරුත නැව අතහැර යන්න යන්නයි. ඒ සමගම ජිවිතාරක්‍ෂක බෝට්ටු නැවෙන් මුහුදට පතිත විය. ඒවනවිටත් නැවෙන් නික්ම යන්නට සූදානම්ව සිටි සංචාරකයෝ වහ වහා බෝට්ටුවලට නැග ගත්හ. තවත් සමහරෙක් බෝට්ටුවලට ගොඩවන්නට වෙහෙසුනහ. වේලාව රාත‍්‍රි 10.20 නැව් මගීන් බේරා ගැනීමේ මෙහෙයුම් ආරම්භ විය. වෙරළාරක්‍ෂක අධිවේගී බෝට්ටු සහ හෙලිකොප්ටර් අනතුරට පත් නෞකාව වෙත ළඟා වූහ. ගිග්ලියෝ දූපතේ ශක්ති සම්පන්න මිනිස්සු ද වෙරළට එක් රොක්ව සිටියහ. බෝට්ටු වලින් හෙලිකොප්ටර් වලින් රැගෙන එන මගීන් තුවාලකරුවන් බාර ගැනීමට ඔවුහු බලා සිටියහ. ගීග්ලියෝ දූපතේ වෙරළ මෙන්ම නෞකාව ද අතිශයින්ම කලබලකාරීය. ගිලෙන නැවක් සමග මුහුදු බත් වන්නට අකමැති වූ ඇතැම් මගියෙක් තමාට බේරී යන්නට අවස්ථාව එනතුරු බලාසිටිය නොහැකිව මුහුදට පැන්නාහ. මුහුද අතිශය සීතල වතුරින් පිරී තිබුණත් ඒ සීතල අතරේ ඔවුහු ජීවිතය පතා පිහිනූහ. මෙසේ මුහුදට පනිද්දී සමහරුන්ගේ අත් පා බිඳිණි. නැව අවට වූ කොරල් පරවල සමහරු වැදුණු අතර ඔවුනට තුවාල සිදුවිය. වේලාව රාත‍්‍රි 11.15 ප‍්‍රථම ජීවිතාරක්‍ෂක බෝට්ටුව දූපතට සේන්දු විය. බෝට්ටුවෙන් ගොඩබිමට පිවිසි මගීහු තම තමන්ගේ ඥාතීන් දුවා දරුවන් මව් පියන් ගැන සිතූහ ඔවුන් ඊළඟ බෝට්ටුවකින් දූපතට ළඟා වනතුරු බලා සිටින්නට වූහ. ජීවිතාරක්‍ෂක බෝට්ටු එකක් පස්සේ එකක් වශයෙන් දූපතට ළඟා වන්නට විය. වේලාව රාත‍්‍රි 11.40 නැවේ කපිතාන් ප‍්‍රැන්සෙස්කෝ ස්චැටිනෝ සොයා ගැනිණි. ඒ වනවිටත් හොදටම කලබලයට පත්ව සිටි ඔහු සිටියේ බෙහෙවින්ම විඩාපත්වය. ජනවාරි 14 සෙනසුරාදා වේලාව අලූයම 1.30 මියගිය තිදෙනකුගේ සිරුරු හමු විය. ඉන් දෙකක් ප‍්‍රංශ ජාතික සංචාරකයන්ගේ වූ අතර එකක් පේරුවියානු නාවික කාර්්‍ය මණ්ඩල සමාජිකයකුගේය. වේලාව අලූයම 2.30 තවත් මිනිසුන් 300ක් තම ජීවිත ගලවාගැනීමේ අපේක්‍ෂාවෙන් යුතුව බලා සිටියි. ජීවිත ගලවා ගැනීමේ මෙහෙයුම තවදුරටත් සිදු කෙරෙයි. වේලාව අලූයම 6.00 අනතුරට පත්වූවන් බේරාගැනීමේ මෙහෙයුම ක‍්‍රියාත්මක කරවූ එන්නියෝ අකුයිල්නෝ පැවසුයේ නෞකාවේ සිරවී සිටි තවත් පුද්ගලයකු බේරාගත් බවයි. ඔහු කිසියම් අනතුරකින් කකුලක් කැඩුණු තැනැත්තෙකු බවයි. ඔහුගේ සේවකයන් විසින් මිනිසුන් සියයක් පමණ දෙනා මුහුදේ පිහිනමින් සිටියදී බේරාගනු ලැබූ බවද කීවේය. තවත් දෙනෙකු පමණ නැවේ සිර වී සිටියදී බේරා ගනු ලැබිණි. ජනවාරි 15 ඉරිදා පෙරවරු 12.15 නෞකාවේ සිරවී සිටි තවත් මිනිසුන් දෙදෙනෙකුගේ ජිවිත බේරාගන්නට හැකිවිය. පෙරවරු 12.58 29 හැවිරිදි දකුණු කොරියානු යුවලක් ඔවුන්ගේ කුටියේ සිරවී සිටියදී බේරාගනු ලැබිණි. සදාකාලික සිහිවටනයක් වනු පිණිස තම මධුසමය ගතකිරීමට පැමිණි මේ යුවල දකුණු කොරියානුවෝ වූහ. ඉයන් සහ ඩොනෙන් නම් වූ මේ යුවළ මධුසමයේ ප‍්‍රීතිය භුක්ති විදිමින් තම කාමරය තුළටම වී සිටියහ. ඔවුන්ද හරියටම ටයිටැනික් නෞකාවේ සිටි බව කියන රෝස් සහ ජැක් යන පෙම්වතුන් යුවළ වැන්න. ටයිටැනික් නෞකාවට එකී පෙම්යුවළ ගෙන ආවේ පසුකාලීන චිත‍්‍රපටය වෙනුවෙන් වුවත් ඩොනෙන් යුවළ නම් අනතුරට පත් නෞකාවේ සිටි සැබෑම පෙම්වතුන්ය. මතු දවසක කොස්වා කොන්කෝඩියා නෞකාවත් චිත‍්‍රපටයට නැගුණහොත් මේ පෙම් යුවළට හිමිවනුයේ අමරණීයත්වයකි. වේලාව පෙරවරු 7 නැවේ තුන්වැනි තට්ටුවෙන් බිහිසුණූ හඩක් නැගිණි. මධ්‍යහ්න 12.00 හෙලිකොප්ටරයක් මගින් නෞකාවේ ආරක්‍ෂක නිලධාරී මැරිකෝ ජිම්පියොට්‍රෝනි බේරාගනු ලැබිණි. ඔහු සිටියේ කකුලක් කැඩි නැගිට ගැනීමටවත් නොහැකිවය. පස්වරු 1.15 මගීන් 11ක් කාර්ය මණ්ඩලය සාමාජිකයන් 6 ක් අතුරුදන්ව තිබේ. පසු සටහන නාවික අනතුර සම්බන්ධයෙන් ප‍්‍රශ්න කිරීමට නැවේ කපිතාන්වරයා අත්අඩංගුවට ගනු ලැබිණි. නැව අනතුරට පත්වූයේ පේනරේටරයේ වරදක් නිසා බව කියැවුණත් නිවැරදි හේතුව අනාවරණය කරගැනීමට දැන් පරීක්‍ෂණ පැවැත්වේ. නැවේ දත්ත ගබඩාව වන කළු පෙට්ටිය හමු වූ විට නාවික අනතුරට නිවැරදි හේතුව සොයා ගත හැකිය. මේ වනවිට මළසිරුරු 11ක් හමුවී ඇති අතර අතුරුදන් වූවන්ගේ ගණන 26 කි. නවකතාකරුවන්ට හා චිත‍්‍රපටකරුවන්ට මේ සිද්ධිය ද ස්වකීය නිර්මාණ සඳහා කදිම අත්දැකීමක් විය හැකිය. එහෙත් ඒ සියල්ල අයිති හෙටටය.

ශාන්ත කුමාර විතාන

සීතල වතුරේ කිමිදුණු හැටි

කොස්ටා කොන්කෝඩියා නෞකාව මධ්‍යධරණී මුහුදේ සීතල දියෙහි ගිලී ගියේ මිනිස් ජීවිත ගණනාවක් ද සඟවාගෙනය. එහෙත් එකී මිනිසුන්ට දිය යටවූ නැවේ කාමරවල හැංගී මියයන්නට නොදී කිමිදුම්කරුවෝ වහා වහා දියේ කිමිදුනහ. රයිටෙරි ඒ අතරින් කෙනෙකි. තියුණු ආලෝකයක් සහිත විදුලි පන්දමක්ද රැුගෙන නැවේ කාමරවලට ගිය ඔහුට දැක ගත හැකිවූයේ අතවත් නොතැබූ කේක්, වයින් වීදුරු, පිඟන්-කෝප්ප ආදියයි. ගිග්ලියෝ දූපත් වෙරළ තීරයේ දක්‍ෂ කිමිදුම්කරුවකු වන රෙයිටෙරි, කොස්ටා කොන්කෝඩියා නෞකාවේ තට්ටුවක් තට්ටුවක් ගානෙත් කාමරයක් කාමරයක් ගානේ ගියේය. ඒ ගමන සරල ලෙස පෙනුණත් බෙහෙවින්ම භයානක එකක් විය. අතුරුදන්වූ ගණන දහසය දෙනකු නමුත් ඔවුන් සොයන්නට කාමර දහසකට වඩා වැඩි ගණනාවක් පුරා පිහිනන්නට සිදුවිය. බොහෝ කාමරවල දොරටු තදින් වැසී තිබු අතර ඒවාට ඇතුළුවීම බෙහෙවින් දුෂ්කර කටයුත්තක් විය. බොහෝ කාමරවල තිර ඇද තිබූ අතර දොර පියන් විවරකරගෙන යද්දී මේ තිරවල පැටලෙනසුළුවිය. එසේ වුවත් ඔහුත් අනෙකුත් කිමිදෙන්නොත් කාමරයෙන් කාමරයට යමින් කව්රුන් හෝ හිරවී ඇද්දැයි සොයා බැලූහ. ”මේ හින්දා මේ රස්සාව ලේසි පහසු එකක් නොවන බව මං තේරුම් ගත්තා.” හියාන්සි නම්වන තවත් නාවික හමුදා කිමිදුම්කරුවෙක් පැවසුවේය. අළු පැහැතිකෙස් කළඹක් ඇති ඔහු නාවික හමුදාවේ ප‍්‍රධාන පෙළේ දක්‍ෂ කිමිදුම්කරුවෙකි. ”මං දැක්කෙ හැම දෙයක්ම බිම පෙරළිලා තියෙන හැටියි. එක කාමරේක රෝද පුටුවක් තිබුණා. එතැනම පොඩි දරුවො අඳින ජාතියේ නැපීස් වගයක් තිබුණා. මම විදුලි පන්දම් එළියෙන් කාමරය පුරාම බැලූවා. ඒත් කිසිම කෙනෙක් මට ඒ කාමරෙන් හොයා ගන්න බැරිවුණා.” මේ මුදාගන්නන්ට එක් කාමරයක සිරවී සිටි කොරියානු ජාතික තරුණ යුවළක් හමුවූයේ ඉරිදාවේය. ඒ දෙන්නා විවාහ වී මධු සමය ගත කරන්නට මේ නැවේ ඇවිත් තියෙන බව පසුව දැන ගත්තා. ඒ වෙද්දී නැව ගිලිලා පැය ගණනක් ගත වෙලා තිබුණා. හැම තැනම කට්ට කළුවර වෙලා. ඔවුන්, කවුරුහරි ඇවිල්ල ඒ අයව බේරගෙන යනතුරු බලාන ඉඳල තියෙන්නෙ. ඉතින් ඒ අයව බේරගෙන ගියේ පුදුමාකාර සතුටකින්. තවත් කාමරේකින් වයසක දෙන්නෙකුගේ මිනී හම්බවුණා. ඒ දෙන්නම ජීවිතාරක්‍ෂක කබා ඇඳගෙන හිමියන් ජීවිත බේරා ගන්න ඉඩක් ලැබිල නැහැ. අවුරුදු පහක් වියැති දැරියක්ද අතුරුදන්වූවන් අතර සිටියාය. ”ඒ දැරිවිව හොයා ගන්න එක හුඟක් සංවේදී කටයුත්තක් වුණා.” රෙයිටෙරි කීවේය. 36 හැවිරිදි පාඔලෝ ජීවිත බේරා ගැනීමට ගිය තවත් කිමිදුම්කරුවෙකි. මීටර් 25ක් ගැඹුරු මුුහුදු පත්ලට ගිය ඔහු නැවේ කොටස්වලට ඇතුළු වී කාමර සෝදිසි කිරීමේ යෙදුණේය. එක්වරම ඔහුට ඇසුණේ යකඩවලින් නැගෙන බිහිසුණු හඬකි. කිමිදුම්කරුවා මොහොතකට බියපත් විය. පෙරළුණු නැව තවත් වටයක් පෙරළෙන්නට හදන බව ඔහුට සිතිණි. එසේ වුවහොත් සිය ජීවිතයද අවසන්වන බව කිමිදුම්කරුවා කල්පනා කෙළේය. මේ වනවිටත් නැවේ පහළම තට්ටුව තිබුණේ මීටර් 37ක් යට මුහුදේය. ”මම ඒ වෙලාවෙම උඩට එන බව ගොඩබිමේ ඉන්නා අයට දැනුම් දුන්නා” පාඔලෝ කීවේය. මිනිත්තු තුනක් ඇතුළත මුහුද මතුපිටට ගිය ඔහු යළිත් කිමිදෙන්නට පටන් ගත්තේ ටික වේලාවකට පසුවය. මේ වනවිට ගොඩබිමට වී විශාල පිරිසක් රැස්ව බලා සිටියහ. සුනඛයන්, ගුහා නිරීක්‍ෂණ කිමිදුම්කරුවන්, මාධ්‍යවේදීන් ඒ අතර වූහ.  

නැවෙන් අතුරුදන්වූ තාත්තයි දුවයි

34 හැවිරිදි ආලොට්ටි සිය බිරිඳගෙන් දික්කසාද වූවෙකි. එහෙත් ඔහු සිය දියණිය වූ ඩයනා ඇගේ මවගෙන් ලබාගෙන නෞකා සංචාරයට එකතු වූවේය. නෞකාව ගිලීමත් සමග තම දියණිය පිළිබඳ කිසිදු පුවතක් නොලැබුනු බව ඩයනාගේ මවවන සුසී ඇල්බර්ටිනා කියන්නීය. ”මම ඇමතුම් සීයක් විතර දෙන්න ඇති. ඒත් මගේ හිටපු සැමියා මට කතා කළේ නෑ. ඊට පස්සේ මම පොලිසියට, නගර ශාලාවට හා ගිනි නිවන හමුදාවට කතා කළා. ඒත් මගේ දුව ගැන ඒ කවුරුවත් දැනගෙන හිටියෙ නෑ. අන්තිම වතාවට මගේ දුව දැක ගන්න ලැබුනේ අඟහරුවාදා උදේ. මම එයාව මොන්ටිසෝරි අරගෙන ගියා. ඇගේ තාත්තා ඇයව රැගෙන ගියේ එදා හවස. එයා එයාගෙ තාත්තා එක්ක නැවේ ගිය පළමු වතාව ඒක නෙවේ. ඒ දෙන්නම නැව් ගමනින් හුඟක් සතුටට පත්වෙනවා. ඔවුන් සිකුරාදා නැවට නැග්ගෙ සිමිටා වෙච්චියා වලදී. සෙනසුරාදා උදේ මං දැනගත්තා නැවට ප‍්‍රශ්නයක් කියලා.” ඇය කියන්නීය.  

බිරිඳගේ ජීවිතය බේරා අතුරුදන්වූ සැමියා

ඇය නිකොලේ සර්වල්. 61 හැවිරිදි ප‍්‍රංශ ජාතික කාන්තාවකි. ඔහු ෆ‍්‍රැන්සිස් සර්වල් 71. හැවිරිදි පුරුෂයෙකි. මේ දෙදෙනා නූතන ටයිනැනික් ඛේදවාචකය සිදුවන විට එම නැවේ ගමන් කළහ. නැව පසෙකට ඇලවී ගිලී යන විට ඔහු සිය ජීවිතාරක්‍ෂක කබාය ගෙන ඇයට පැළැඳුවේය. ඔහුට පිහිනීමට හැකියාවක් තිබුණත් ඇයට පිහින්නට නොහැකි විය. ”පනින්න... පනින්න.... පනින්න...” ඔහු කෑ ගසා කීවේය. එහෙත් පිහිනන්නට නොදත් ඇයට මුහුදු දියට පනින්නට බිය සිතිණි. ඊළඟ මොහොතේ ඔහු නැවෙන් මුහුදට පැන්නේ සිය බිරිඳට එන්න බය වෙන්න එපා යැයි ද කියමිනි. ඔහුගේ රුව අන්ධකාරයේ නොපෙනී යද්දී ඇයද නැවෙන් මුහුදට පැන්නාය. එහෙත් ඉනික්බිති ඇයට ඔහු දැකින්නට නොලැබිණි. ”එයා මගේ ජීවිතේ බේර ගත්තා. ඒත් මට එයා නැතිවුණා.” ඇය කියන්නේ බෙහෙවින් හැඟුම්බරවය. ”මුහුදු දියේ උෂ්ණත්වය අංශක අටයි. මං සීතලේ ගැහුණා. මිනිස්සු ඇවිත් මාව බේරගත්තා.” ඇය තවමත් ජීවත්වන ආකාරය විස්තර කරමින් කියා සිටියාය.