මුලින්ම හමුවුණේ දකුණු පළාත් සභාව සඳහා එක්සත් ජනතා නිදහස් සන්ධානයෙන් තරග වැදීමට ශ්‍රී ලංකා නිදහස් පක්ෂයේ අපේක්ෂක ලැයිස්තුවේ සම්මුඛ පරීක්ෂණය සඳහා පෙනී සිටි, ප‍්‍රවීණ සිනමා නිළි, චිත‍්‍රපට නිෂ්පාදිකා ගීතා සමන්මලී කුමාරසිංහය.

 ඇයි ඔබ මෙවර දකුණු පළාත් සභා ඡන්දෙට ඉල්ලන්න ඉදිරිපත් වුණේ?
මම 2010 සිට මේ දක්වා සම්පූර්ණයෙන්ම ආසනයක සංවිධායක හැටියට මගේ මුළු ජීවිතයම කැපකරලා වැඩකරන කෙනෙක්. අඩුම තරමින් මම ගමේම ඉඳගෙන උපරිම කැපවීමෙන්, මගේ සියලූ මුදල් ගමේ ජනතාව වෙනුවෙන්, ඔවුන්ගේ දුක - සැප වෙනුවෙන් වියදම් කරමින් ඉන්න කෙනෙක්. එහිදී මා දැනගත්තා, ගමේ වැඩවලට පළාත් සභාවෙන් තමයි ලොකු කාර්යභාරයක් සිදුවන්නේ කියා. සමහර පාරවල් ගැන, පාසල් ගැන කටයුතු කරන්න යද්දී ප‍්‍රශ්න ඇතිවෙනවා. මොකද ඒවා පළාත් සභාවට අයිති නිසා.
​​
මම මෙච්චර වැඩකරලා තිබෙද්දී, ජනතාව මට කොහොමද කැමති කියලා දැනගන්න කැමතියි. ජනතාවගේ කැමැත්ත උරගා බලන්න මෙය හොඳ අවස්ථාවක්. ඒ හින්දයි මම මෙවර ඉදිරිපත් වුණේ. ඒ තුළින් මට ලොකු සේවයක් කරන්න පුළුවන්. නිකම් පළා බබා කෙනෙක් වෙලා වැඩක් නෑ. මම ඉල්ලන්නේ මහ ඇමැති ධූරයටයි.

​ ඔබ තරගවදින්නේ මහ ඇමැතිධූරය බලාගෙන. ඇයි ඒ තනතුරම අවශ්‍ය?
එයින් තමයි ගමට, දිස්ත‍්‍රික්කයට වැඩක් කරන්න පුළුවන්. පසුගිය කාලයේ හරියට අසාධාරණකම් ගාල්ල දිස්ත‍්‍රික්කයට සිදුවී තිබෙනවා. ඒක කට්ටියකට විතරක් සලකන තත්ත්වයක් තිබුණේ. හරි භයානකයි. එහෙම නැතුව ගාල්ල දිස්ත‍්‍රික්කයටම වැඩකරන්න පුළුවන් කෙනෙක් ලෙසයි මා ඉදිරිපත් වෙන්නේ. සංචාරක ව්‍යාපාරය, සංස්කෘතිකාංග රැුකගන්න විශාල වැඩපිළිවෙළක් එයින් කරන්න පුළුවන්. ඒවාට කවුරුත් අත ගහලා නෑ. නිකම් හෝටල් හදලා වැඩක් නෑ. ඒ ඒ පළාත්වලට ආවේණික දේ තිබෙනවා. ජනාධිපතිතුමාගේ සංවර්ධන වැඩපිළිවෙළට ලොකු රුකුලක් වෙනවා මේ දකුණු පළාත් සභාව. එය නිකම්ම නිකම් සමාජ සේවයට කැපවූ තැනක් වෙන්න බැහැ.

​ ඔබ කෙළින් කතාකරන කෙනෙක්. සමහරුන්ට මේ කෙළින් කතාව අල්ලන්නේ නෑ. ඔබගේ මේ දැඩි වචන ප‍්‍රහාර වලින් මනාප ගැනීමේදී ප‍්‍රශ්නයක් ඇතිවන්න පුළුවන් නේද?
යථාර්ථය දකින්න මා කැමතියි. බොරුව මා ළඟ නෑ. මා ඉල්ලන්න හේතුවක් තිබෙනවා. ඒ හේතුව පැහැදිලි කිරීම මගේ යුතුකමක්. මා විතරක් නොව ගාලූ දිස්ත‍්‍රික්කයේ ජනතාවම මේ කාරණා ගැන දන්නවා. ඔවුන් මා කියන්නේ මොනවාද කියාත් දන්නවා. ඒ හින්දා ඔවුන් මට විශ්වාසයි. මා කිවයුතු දේ කෙළින් අදත් කියනවා. හෙටත් කියනවා. ඒක ජනතාව දන්නවා.

​ මඩ, කටකතා,  ඕපාදුප වගේම ප‍්‍රහාරවලටත් මේ දේශපාලනයේදී ලක්වෙන්න සිදුවෙනවා. ඔබට මේවාට මුහුණ දෙන්න ශක්තියක් තිබෙනවාද?
 ඕවාට එදා ඉඳලම මුහුණ දෙනවා. ඒවාට මුහුණ දෙන්න මට ලොකු ශක්තියක් තිබෙනවා. මම ඒවා තඹ දොයිතුවකටවත් ගණන් ගන්නේ නෑ.  ඕන කතාවක් ඒ අයට කියන්න පුළුවන්. වැදගත් වෙන්නේ හතුරෝ කියන කතාව නොව, තමන් කරන ක‍්‍රියාවයි. මම ක‍්‍රියාවෙන්ම ඔප්පු කළා, පැරදුණත් ගාලූ දිස්ත‍්‍රික්කයේ ජනතාව අතනොහැර සිටීම. දැන් මම අවුරුදු 4කට පස්සේ ඡන්දෙකට මේ එන්නේ. මේ අවුරුදු 4 තුළ කලා ජීවිතයේ කිසිම දෙයකට ගියේ නෑ. මොකද මම ගමට වෙලා හිටියා.
 

ඊළඟට අපට හමුවූයේ දකුණු පළාත් සභාවට එක්සත් ජාතික පක්ෂයෙන් තරග කිරීමට අපේක්ෂකත්වය ඉල්ලා සිටින ජනප‍්‍රිය රංගන ශිල්පිනියක හා ටෙලිනාට්‍ය නිෂ්පාදිකාවක වන නදීෂා හේමමාලිය.

​ ඇයි ඔබ ඡන්දෙ ඉල්ලන්න බලාපොරොත්තු වෙන්නේ?
මට අවශ්‍ය ජනතා සේවකයෙක් වෙන්නයි. මම දකුණේ ඉපදුණු කෙනෙක්. මගේ පවුල් පසුබිම එක්සත් ජාතික පක්ෂයට සම්බන්ධයි. අනෙක මේ තිබෙන ක‍්‍රමයේ වෙනසක් දකින්න  ඕනේ. මේ දියවෙලා, කුණු වී යන ක‍්‍රමයට විරුද්ධව කරන සටනක් නිසා මා එක්සත් ජාතික පක්ෂය තෝරාගත්තේ. මට ලොකු වැඩපිළිවෙළක් තිබෙනවා. ඒවා ක‍්‍රියාත්මක කරන්න තමයි මෙවර ඡ​න්දෙ ඉල්ලන්න මා බලාපොරොත්තු වෙන්නේ?

​ මොනවද ඔබට දකුණේ ජනතාව වෙනුවෙන් කරන්න පුළුවන් වෙන්නේ?
මගේ දර්ශනය, ප‍්‍රතිපත්ති එක්ක තමයි මා දකුණට ඉදිරිපත් වෙන්නේ. ඉතිං ඒ දර්ශනය දකුණේ තරුණ - තරුණියන් පිළිගනියි කියා මා විශ්වාස කරනවා. ඒ තුළ තමයි ඔවුන් මට කැමති, අකැමති බව ප‍්‍රකාශ වන්නේ. මට ඔවුන් විශ්වාසයි. දකුණේ ජනතාවට කළ හැකි දේ ඉදිරියේදී මා ප‍්‍රකාශ කරාවි.

​ දකුණට මෙවර ඔබත් සමග ගීතා, අනර්කලී යන තාරකාවන්ද තරග වදිනවා. ඔවුන් අභියෝගයක් නේද?
කොහෙත්ම නෑ. මට අභියෝගය තිබෙන්නේ මා සමගමයි. මොකද මට ප‍්‍රතිපත්ති තිබෙනවා. මට ආදරය කරන ජනතාව පිළිගත්තොත් තමයි මට ඒක වටින්නේ. ඔවුන් මට අභියෝග නොවෙයි. දේශපාලන මතවාද අනුව ඉදිරියේදී අපි හැප්පෙන්න පුළුවන්. කෙස්වලූ පටලවා ගන්න පුළුවන්. හැබැයි පුද්ගලිකව නම් නොවෙයි. ඉදිරියේදී ජනතාවට දැනගන්න පුළුවන් වේවි අපි මොනවද කරන්නේ කියලා.

​ මඩ, කටකතා,  ඕපාදුප, වගේම ප‍්‍රහාරවලටත් මේ දේශපාලනයේදී මුහුණ දෙන්න සිදුවෙනවා. ඔබට ඊට මුහුණ දෙන්න ශක්තියක් තිබෙනවාද?
ඔව්, ඊට හොඳම උදාහරණය අපේ නායකතුමා රනිල් වික‍්‍රමසිංහ.  ඕනෑම මඩ, කටකතා,  ඕපාදුප හැම එකකටම ඔරොත්තු දෙන්න පුළුවන් ශක්තියක් එතුමා පෙන්නුම් කරලා තිබෙනවා. ඒ නිසා මටත් එවැනි  ඕනෑම දෙයකට මුහුණ දෙන්න ශක්තියක් තිබෙනවා. ඒ නිසයි මම එක්සත් ජාතික පක්ෂයෙන් ඉදිරිපත් වුණෙත්.
​

ජනප‍්‍රිය රංගන ශිල්පිනියක වන රුවන්ති මංගලාද මෙවර බස්නාහිර පළාත් සභාව වෙනුවෙන් එක්සත් ජනතා නිදහස් සන්ධානය යටතේ තරග වැදීමට ශ්‍රී ලංකා නිදහස් පක්ෂයෙන් අපේක්ෂකත්වය ලබාගැනීමට සම්මුඛ පරීක්ෂණයට පෙනී සිටි තවත් තාරකාවකි.

​ ඇයි රුවන්ති, ඔබ ඡන්දෙ ඉල්ලන්න බලාපොරොත්තු වෙන්නේ?
මගේ තාත්තා ශ්‍රී ලංකා නිදහස් පක්ෂයට වැඩ කළ කෙනෙක්. දැන් නම් තාත්තා ජීවතුන් අතර නෑ. අනෙක් එක දැන් හොඳ නායකත්වයක් තිබෙනවා. රට සංවර්ධනය වෙනවා. අපේ අනාගත පරපුර වෙනුවෙන් තමයි ජනාධිපතිතුමා මේ රට සංවර්ධනය කරන්නේ. කලාකාරිනියක්, මවක්, බිරිඳක් විදිහට මටත් හිතුණා, ජනතාවට සේවයක් කරන්න  ඕනේ කියලා.

​ කලාකරුවන් දේශපාලනයට ඇවිත් කරපු දේවල් මදිද? ඔබ එන්නේ මොන අරමුණින්ද?
එහෙම නම් එකක් කියන්න මා දන්නේ නෑ. මට තවම අපේක්ෂකත්වය ලබාදීලා නෑ. මට හම්බවෙලා, ජනතා මනාපයෙන් මන්ත‍්‍රීවරියක් වෙන්න ලැබුණොත්, මා අනිවාර්යෙන්ම ජනතාවට සේවය කරනවා. කලාවෙනුත් අයින්වෙලා ජනතාවට සේවය කරන්න තමයි මා බලාපොරොත්තු වෙන්නේ. අනෙක් කලාකරුවන් කරන දේ ගැන නම් මා දන්නේ නෑ.

​ ඔයාගේ මොනවද වැඩපිළිවෙළ?
තවම අපේක්ෂකත්වය ලබාදීලා නැහැනේ. දීලා තනතුරට මා පත්වුණොත්, ඒ තනතුරේදී මොනවද මට මහජනතාව වෙනුවෙන් කරන්න පුළුවන් සේවය, ඒ සේවය මම අකුරටම ඉටුකරනවා. මටත් වැඩපිළිවෙළක් තිබෙනවා. ඒවා ඉදිරියේදී මා ඉදිරිපත් කරන්න බලාපොරොත්තු වෙනවා. හැබැයි බොරු පොරොන්දු නම් මා දෙන්නේ නෑ.

​ මේ ඡන්දෙට සමහරු කෝටි ගණන් මුදල් වියදම් කරනවා. ඔබට කලාකාරිනියක් ලෙස මෙවැනි දේවල් සමග හැප්පෙන්න පුළුවන්ද? ඔය විදිහට වියදම් කරන්න පුළුවන්ද?
ගොඩාක් අය මේ වනවිටත් මට උදව් කරන්න කතා කරනවා. මගේ මහත්තයාත් ජනප‍්‍රිය ගායකයෙක්. (ගායන ශිල්පී නාමල් උඩුගම) අපට හොඳ රසික පිරිසක් ඉන්නවා. මා හිතනවා ඒ අය මට අඩුම ගණනේ එක මනාපයක්වත් ලබාදෙයි කියා. එය ලැබෙන බව මට ස්ථිරයි. රසිකයන් දන්නවා, අපි කොයි වගේ අයද කියා. අපට සෑහෙන රසික පිරිසක් ඉන්න හින්දා මට බයක් නෑ. ලොකුවට මුදල් වියදම් කරන අය සමග හැප්පෙන්න මට අවශ්‍ය නෑ. මා හැප්පෙන්න යන්නෙත් නෑ.

​ මේ දේශපාලන ක්ෂේත‍්‍රය එච්චර සුන්දර නෑ. මේ තත්ත්වයට මුහුණ දෙන්න ඔබට ශක්තියක් තිබෙනවාද?
අනිවාර්යෙන්ම ශක්තියක් තිබෙනවා. දේශපාලනයේ විතරක් නොවෙයි,  ඕනෑම ක්ෂේත‍්‍රයක මඩ, කටකතා,  ඕපාදුප තිබෙනවානේ. කලා ක්ෂේත‍්‍රයේත් තිබෙනවා. උණුසුම් හින්දා දේශපාලනයේ ඒවා ටිකක් වැඩිවෙලා තිබෙන්නේ. මොනවා වුණත් ඒවාට මුහුණ දෙන්න මට පුළුවන්. ඒ ශක්තිය මට තිබෙනවා.
 

ඊළඟට හමුවුණේ ප‍්‍රසංග වේදිකාවට නැතුවම බැරි ගායිකාවක් වන ජින්ජර් වයිට්ය. ගායිකාවක් ඡුන්දෙට ඉල්ලන ප‍්‍රථම අවස්ථාව ලෙස මෙය සැලකේ. එක්සත් ජනතා නිදහස් සන්ධානයෙන් බස්නාහිර පළාත් සභාවට තරග වැදීමට ශ්‍රී ලංකා නිදහස් පක්ෂයේ අපේක්ෂකත්වය ලබාගැනීමට ජින්ජර්ද එක්වූවාය.

​ ජින්ජර් ඔයා ගායිකාවක් ලෙසටයි අප හමුවට මෙතෙක් ආවේ. දැන් දේශපාලනයට ඇවිත්. ඇයි මෙවර පළාත් සභාවට තරග කරන්න අදහස් කළේ?
මට ආරාධනාවක් ලැබුණා පළාතේ පාර්ලිමේන්තු මන්ත‍්‍රීවරයෙක්ගෙන්. එතුමන්ගෙන් මම ඉස්සෙල්ලා අහපු ප‍්‍රශ්නය තමයි ”ඔබතුමා හිතනවාද මම හොඳ දේශපාලනඥයෙක් වෙයි කියලා.” එතුමාගේ විශ්වාසය උඩ තමයි මා දේශපාලනයට ආවේ.

​ ඒ කියන්නේ ඔයාට කැමැත්තක් තිබුණේ නැද්ද දේශපාලනයට එන්න?
අපෝ කැමැත්තක් තිබුණා. අපේ රටේ දේශපාලනඥයන් ගැන කවුරුත් හොඳ කියන්නේ නැහැනේ. ඇත්තම කියනවා නම්, මාත් සිවිල් පුරවැසියෙක්නේ. අපි ඔක්කොම දරණ මතය තමයි දේශපාලනඥයා හොඳ නෑ කියලා. මා හිතනවා ඒක වෙනස්කරන්න, ඒ මතය බිඳහෙලන්න කාටහරි පුළුවන් නම්, ඒ වගේ දෙයකට අතගැසීම ප‍්‍රශ්නයක් නෑ කියලා. මා ඉදිරිපත් වෙන්නෙත් ඒ මතය බිඳ හෙළන්නයි.

​ ඔයාගේ වැඩපිළිවෙළක් තිබෙනවාදමෙවර පළාත් සභා ඡන්දය වෙනුවෙන්?
හැමෝම මගෙන් අහන දෙයක් තමයි, කලාකරුවෝ දේශපාලනයට එන එක අද විලාසිතාවක් වෙලා. මොනවද තියන සුදුසුකම්? මොකටද ආවේ කියලා. ඇත්තම කියනවානම් මට කියන්න තිබෙන්නේ පළමු වතාවට ගායිකාවක් ඉතිහාසයේ ඉදිරිපත් වුණේ මෙවරයි. මෙතෙක් ඉදිරිපත් වුණේ නළු නිළියන්.

මම ප‍්‍රසංග වේදිකාවේ සිටින ගායිකාවක්. එතැනත් තිබෙනවා වෙනසක්. මම අවුරුදු 12ක් ප‍්‍රසංග වේදිකාවේ ගී ගයනවා. මම මිනිසුන් එක්ක හරිම සමීපව ගැවසෙන කෙනෙක්. සරල භාෂාවෙන් මා කතා කරන්නේ. මම ප‍්‍රසංග වේදිකාවට නැගලා යමක් කරලා තමයි එතනින් යන්නේ. මම ඒ පිරිසට දැනෙන්න යමක් කරලයි යන්නේ. මම පළමු ෂෝ එක කළ විදිහටමයි, 4 වැනි ෂෝ එක කරන්නෙත්. ඒක මම ජනතාවට දැනෙන්න ඉඩ තියන්නේ නෑ. මේ මගේ 4 වැනි ෂෝ එක කියලා. පළමු ෂෝ එකේ ජවයෙන්මයි මා කරන්නේ.

මට තමයි ලොකුම අභියෝගය තිබෙන්නේ. නළු නිළියන් කැමරාව ඉදිරිපිට ඉන්න අය. මම ඡුන්දෙ ඉල්ලලා දිනුවත් ආපහු යන්නේ ප‍්‍රසංග වේදිකාවට. මාව මිනිස්සු නිතරම දකිනවා. නළු නිළියන් පස්සේ යන්නේ කැමරාවක් ඉදිරියටයි. ලොකුම අභියෝගය මටයි. මම සයුරක් වගේ ජනතාවට මා සමග  ඕනෑම වෙලාවකට ඇවිත් කතා කරන්න පුළුවන්. බස්නාහිර පළාතේ ප‍්‍රසංගවලට මම  ඕනෑතරම් යනවා. මට බොරු කරන්න බැහැ. ඒක මට ලොකු අභියෝගයක්. නමුත් මට පුළුවන් හින්දා තමයි මම මේක භාරගත්තේ. මම බය නෑ. මම මිනිස්සු සතුටු කරනවා. ඇයි ඒක නැති කරගන්නේ?

​ දේශපාලනය අපි කියන තරම් සුන්දර නෑ. මඩ වගේම ප‍්‍රහාරත් එල්ල වෙන්න පුළුවන්. ඔබට ඒවාට මුහුණ දෙන්න ශක්තිය තිබෙනවා කියලා විශ්වාසද?
මම කලාවට ආ දවසේ සිටම විවේචනයට, ආන්දෝලනයට ලක්වූ කෙනෙක්. මට හොඳටම බැණුම් අහලා පුරුදුයි. මට අවවාද අරගෙන හොඳට පුරුදුයි. ඉතිං මාව හොඳට ඔප මට්ටම් වෙලා තිබෙන්නේ. මම ජනතාවත් එක්කමයි ඉන්නේ. ප‍්‍රසංග වේදිකාව කියන්නේ අවම පහසුකම් තිබෙන තැනක්. මට පළාත් සභාවට යන්න වරමක් ලැබුණොත්, මා හිතනවා එතනත් මට වෙනසක් කරන්න පුළුවන් කියන විශ්වාසය තිබෙනවා. මොකද මම වැඩකරන්නේ මගේ හිතේ හයියෙන්. මගේ ආත්ම ශක්තිය ප‍්‍රබලයි. යමක් සිතුවොත් එය කරන්න පුළුවන් කියන විශ්වාසය මා තුළ තිබෙනවා. එය පුද්ගලයාගෙන් පුද්ගලයාට වෙනස් වෙනවා.
වෙනසක් කරන කොට මිනිසුන්ට ඒක දැනෙනවා. ඉතිං ඒ දැනෙන්න පුළුවන් දෙයක් දේශපාලනයේදීත් කරන්න පුළුවන් නම්, එය වටිනවා. මා බලාපොරොත්තු වෙන්නෙත් දැනෙන දෙයක් කරමින් සමාජයට සේවයක් කරන්නයි. හැමදේම ඔළුවෙන් කළොත් හොඳ දෙයක් කරන්න පුළුවන්. ඔය මඩ, කටකතා මට හොඳට පුරුදුයි. ඒ නිසා මට ඒවාට මුහුණදෙන්න ශක්තිය තිබෙනවා.
 

රංගන ශිල්පිනියක, මෝස්තර නිරූපිකාවක මෙන්ම ලෝක රූ රැජින තරගවලදී මෙරටට කීර්තියක් අත්කරදුන් ගයේෂා පෙරේරාද මෙවර එක්සත් ජනතා නිදහස් සන්ධානයෙන් බස්නාහිර පළාත් සභාවට තරග වැදීමට ශ්‍රී ලංකා නිදහස් පක්ෂයේ අපේක්ෂක ලැයිස්තුවට සම්මුඛ පරීක්ෂණ සඳහා පෙනී සිටියාය.

​ ගයේෂා ඇයි ඔයා ඡන්දේ ඉල්ලන්න ඉදිරිපත් වුණේ?
මම කාලයක සිට දේශපාලන කටයුතුවල නියැලී සිටින කෙනෙක්. 2010 දී මම ශ්‍රී ලංකා නිදහස් පක්ෂයේ සාමාජිකත්වය ලබාගත්තා. ජනාධිපතිවරණයේ සිට අද දක්වාවූ සියලූම මැතිවරණවලදී මම පක්ෂ පාට භේදයකින් තොරව කටයුතු කළා. අද ඊයේ දේශපාලනයට සම්බන්ධවූ කෙනෙක් නොවෙයි. හැබැයි ඡුන්ද කරළියට, මනාප කරළියට ආ පළමු වතාව මෙයයි.
එයට එන්න හිතුණේ දැන් තිබෙන දේශපාලනය ගැන මිනිසුන්ගේ තිබෙන කලකිරීම හින්දයි. ජාත්‍යන්තර තලයේ තරග වලින් දිනපු කෙනෙක් විදිහට, මට හිතෙනවා ලොකු වෙනසක් මේ තුළින් කළ හැකියි කියා. දේශපාලනය ගැන මිනිසුන්ට මීට වඩා හොඳ ආකල්පයක් ඇතිකරන්න මට පුළුවන් වෙයි කියා මා තුළ විශ්වාසයක් තිබෙනවා. බලයක් මට ලැබෙනවා නම් ජනතාවට දැනෙන්න යමක් මට කළ හැකියි. ඒ අරමුණ ඔස්සේ තමයි මා මෙවර ඉදිරිපත් වුණේ.

​ දේශපාලන ක්ෂේත‍්‍රය ඔය කියන තරම් සුන්දර නෑ. කට කතා,  ඕපාදුප වගේම ප‍්‍රහාර වලට ලක්වෙන්න පුළුවන්. ඔබට මේවාට මුහුණ දෙන්න ශක්තියක් තිබෙනවාද?
මට ඒවා හොඳට පුරුදුයි. පහුගිය කාලයේ මම මහත් ආන්දෝලනයට ලක්වූ කෙනෙක්. මට මල් වැදුණා. ගල් වැදුණා. ඒ හැමදෙයක්ම දරාගැනීමේ ශක්තිය මට තිබුණා. පොඩි මිනිසාගේ සිට මාව හඳුනනවා. රටේ සියලූදෙනාම හඳුනනවා. මා යන තැනකදී මිනිස්සු 1000-2000ක් මා වටා රොක්වෙනවා. මා හිතන්නේ එය ලොකු ජයග‍්‍රහණයක්. මා යන තැන එහෙම එක්වෙනවා කියන්නේ ජනතාව මට ආදරේ බවයි. 

​ සමහරු මේවාට අති විශාල මුදල් සම්භාරයක් වියදම් කරනවා ජයග‍්‍රහණය වෙනුවෙන්. මේ තුළ ඔයාලටත් පුළුවන්ද හැප්පෙන්න?
මගේ පවුලේ අය මේ සඳහා උදව් උපකාර කරනවා. ඒ වගේම මගේ හිතවතුන් සෑහෙන ප‍්‍රමාණයක් මට උදව් කරනවා. අනෙක ජනතාව මට ආදරේ හින්දා ඔවුන් ගැන මට ලොකු විශ්වාසයක් තිබෙනවා. 

​ මොනවද ඔයාගේ වැඩපිළිවෙළ?
මගේ වැඩපිළිවෙළ රාශියක් තිබෙනවා. ප‍්‍රධාන වශයෙන් කරුණු 3ක් සඳහා මා කැපවෙනවා. පළමුවැන්න කාන්තාවන්ට සිදුවන හිංසනයන් වෙනුවෙන් කාන්තා හිංසන වැලැක්වීමේ මධ්‍යස්ථානයක් ආරම්භ කරන්න කටයුතු යොදනවා. දෙවැන්න මේ රටේ, විශේෂයෙන් බස්නාහිර පළාතේ දරුවන්ගේ පෝෂණය සම්බන්ධයෙන් ලොකු වැඩපිළිවෙලක් ක‍්‍රියාත්මක කරනවා. තුන්වැන්න තමයි නගරයක් නගරයක් පාසා, ගමක් ගමක් ගානේ, ගෙයක් ගෙයක් ගානේ ගිහින් ගයේෂා පෙරේරා, ඒ ජනතාව සමග එකතුවී ඔවුන්ගෙන් පුද්ගලික දේවල්වලට දායක වෙනවා. කාණු පවිත‍්‍ර කර පිරිසුදු කිරීමට මම පුද්ගලිකව එක්වෙනවා. ඒ වගේම එක්සත් ජනතා නිදහස් සන්ධානය අති බහුතරයකින් ජයග‍්‍රහණය කිරීමට මගේ උපරිම ශක්තිය හා කැපවීම යොදවනවා.