වසන්ත කරන්නාගොඩ මහතා ජපන් ඇමැතිවරයකු සමග

ශ්‍රී ලංකාව යනු ලෝක සිතියමේ අබැටක් තරමේ කුඩා රටකි. එහෙත් ලොව කවර රටකට, ජාතියකට නොදෙවැනි අදීන අදම්‍ය අපරාජිත ශ්‍රේෂ්ඨ ඉතිහාසයක් අප සතුව ඇත. ජපානයේ තෝකියෝ නුවර පැවැති ”ශ්‍රී ලංකා සැණකෙළිය” ඒ අපරාජිත උරුමය කැඩපතක තබා පිළිබිඹු කළ සැණකෙළියක්ම විය.

ලෝකයේ රටවල් හැට පහක පමණ ශ්‍රී ලංකා තානාපති කාර්යාල පිහිටා තිබේ. ඒ තානාපති කාර්යාල හැට පහෙන්ම විශාලම සැණකෙළිය පැවැත්වෙන්නේ ජපානයේ බව නිර්භයව ප‍්‍රකාශ කළ හැකි යැයි ආර්ථික සංවර්ධන අමාත්‍යංශයේ ජ්‍යෙෂ්ඨ නිලධාරියෙක් පැවැසුවේය. ඒ ජපන් සංචාරයෙන් පසුව ඒ පිළිබඳව ආගිය කතාබහක නිරතව සිටියදීය. ඒ සහතිකය ජපානයේ තෝකියෝ නුවර යොයෝගි කී‍්‍රඩාංගණයේ පැවැති ශ්‍රී ලංකා සැණකෙළි දිනය සම්බන්ධයෙන් ලැබුණු අගනාම සහතිකය වේ. ජපානයේ ශ්‍රී ලංකා තානාපති අද්මිරාල් වසන්ත කරන්නාගොඩ මහතාගේ ප‍්‍රයත්නය මල්ඵල දැරු බවට ඒ සහතිකය දෙස් දෙයි.

සැණකෙළි භූමිය පුරා ශ්‍රී ලංකා ආහාර කුටි පනහකට වැඩියෙන් තිබිණි. ඒවා ඉදිරිපිට පැය ගණනක් පෝලිම් ගැසී සිටි ජපන් ජාතිකයන් ගණන සිය ගණනකි. රස නහර පිනා යන ආහාරවල සුවඳ යෝයෝගි කී‍්‍රඩාංගණය පුරා සිසාරා යයි.

”කෑම හරිම රසයි ... මේ කෑම කන්න ලංකාවට යන්න හිතෙනවා.” මගේ මිතුරකු සමග ජපන් ජාතිකයෙක් කීවේය.

”ඇයි රසයි කියන්නේ ...? මගේ මිතුරාගෙන් ප‍්‍රශ්නයකි.

”කෑමවල රසය විනාශ නොකර ඒ රසය රැකගෙන මේ කෑම හදලා තියෙනවා.” ජපන් ජාතිකයා එසේ කී බව මගේ මිතුරා කීවේය.
ශ්‍රී ලංකාවේ ආහාර ජපන් ජාතිකයන් අතර ප‍්‍රචලිත කිරීමේ වෑයමේ නිරතව සිටින අපේ කොල්ලන්ට කෙල්ලන්ට අප සමග වචන දෙක තුනක් හෝ කතා කිරීමට ඉස්පාසුවක් නොමැති තරම්ය.
 

උදය අතුකෝරාල

”වැඩ ... වැඩ ... උදේ හතට පටන් ගත්තේ. තවම වතුර උගුරක් බීගන්න බැරි වුණා.” සාමන්ත කීවේය. ඒ වනවිට වේලාව දහවල් 12ට පමණ වී තිබිණි.

දේශීය ආහාර පානයෙන් සන්තර්පනය වන ජපන් ජාතිකයන්ට අපේ පි‍්‍රයතම පානයක් වන තැඹිලි ගෙඩියක රසය විඳීමේ අවස්ථාව ද සලසා තිබිණි.

”ලංකාව කියන්නේ මොනවගේ රටක්ද කියලා මේ ආහාරපාන වලින්ම හඳුනා ගන්න පුළුවන්. මේ අවුරුද්දේ දෙසැම්බර් වලදී මම පවුලේ අයත් සමග අනිවාර්යයෙන්ම ලංකාවට යනවා.” ජපන් ජාතික තරුණියක කීවාය. මගේ මිතුරා කී පරිදි ඇය ජපානයේ සරසවි සිසුවියකි. ඇය පැමිණ සිටියේද පවුලේ පිරිස සමගිනි.

ප‍්‍රදර්ශන භූමියේ ඉඩකඩ ඇති සෑම තැනකම කළාල එළා හෝ බංකු මත වාඩිවී ආහාර ගන්නා දසුන හිමිදිරියේ සිට සන්ධ්‍යාව ගෙවී යන තුරුම නොවෙනස්ව පැවැති දසුනකි.

මේ දසුන දැකීමෙන් තානාපති අද්මිරාල් වසන්ත කරන්නාගොඩ මහතා අප‍්‍රමාණ ලෙස සතුටට පත්ව සිටිනු ඇතැයි මම සිතුවෙමි. එහෙත් මට ලැබුණේ මා බලාපොරොත්තු වූ ප‍්‍රතිචාරය නොවේ.

”අපි මේකට ගොඩාක් මහන්සි වෙනවා. ශ්‍රී ලංකවා කියන්නේ සංචාරයට පමණක් නොව වාසයටද ඉතා හිතකර එමෙන්ම ස්වභාවික සම්පත්වලින් අනූන රටක් කියන පණිවිඩය අපි මේ රටේ ජනයා තුළ ඇති කරන්නයි මේ සැණකෙළිය පවත්වන්නේ. ඒ වෙනුවෙන් ශ්‍රී ලංකාවේ රාජ්‍ය ආයතන අපට ගොඩාක් උදව් කරාවි කියලා අපි බලාපොරොත්තු වුණා. ඒ අනුග‍්‍රහය අපට ලැබුණේ නෑ. සංචාරක මණ්ඩලයෙන් විතරයි අපට දිරිගන්වන සුළු අනුග‍්‍රහයක් ලැබුණේ. ඒ සම්බන්ධයෙන් මම කනගාටු වෙනවා.” අද්මිරාල් වසන්ත කරන්නාගොඩ මහතා එසේ කීවේය. එබඳු ලතැවිල්ලක් ඔහුට උරුම කරදීම යුතු නැතැයි මම විශ්වාස කරමි.

ශ්‍රී ලංකාව යනු නරකාදියක්ව පැවති සමයක් විය. ඒ යුද සමයේදීය. තිස් වසරක් පුරා දිග්ගැස්සුණු ඒ යුද්ධයෙන් මිනී කඳු ගොඩ ගැසිනි. ලේ විල් නිර්මාණය විය. මරාගෙන මැරෙන මිනිස් බෝම්බයකින් පැති බෝම්බයකින් ජීවිතය බේරා ගැනීම ජීවිතයේ එකම ප‍්‍රාර්ථනය බවට පත්වූ ඒ සමය මෙයට සිව් වසරට පෙර අවසන් විය. ඒ වෙල්ලමුල්ලිවයික්කාල්හි නන්දිකඩාල් කළපුව අද්දර වගුරු බිමක තිබී ප‍්‍රභාකරන්ගේ වෙඩි වැදුණු මළ සිරුර සොයා ගැනීමත් සමගය. ඒ මහා සංග‍්‍රාමයේදී නාවික සෙබළ සේනාවන්ට අණ දුන් ප‍්‍රතාපවත් රණවිරුවා අද්මිරාල් වසන්ත කරන්නාගොඩය. මාතෘ භූමිය ඒ සැහැසි යුද ග‍්‍රහණයෙන් මුදා ගැනීමට අණ දුන් රණවිරුවා අද ඒ මවුරටෙන් මිදී ඉතා අවිවේකී ජීවිතයකට උරුමකම් කියයි. ඒ සම්බන්ධයෙන් ප‍්‍රමාණය ඉක්මවා ගිය ප‍්‍රසාදයක් ජපානයේ වෙසෙන ශ‍්‍රී ලංකිකයන් තුළ මෙන්ම මෙවර ශ්‍රී ලංකා දිනය සැමරුම් උළෙලට සහභාගිවීමට ශ්‍රී ලංකාවේ සිට පැමිණි ආයෝජකයන් තුළද වේ. සෑම ප‍්‍රදර්ශන කුටියකදීම වසන්ත කරන්නාගොඩ මහතාට ශ්‍රී ලාංකිකයන්ගේ ප‍්‍රණාමය නොඅඩුව හිමි විය.

බුද්ධික සිරන්ත මෙවර ජපානයට පැමිණ සිටියේ ශ්‍රී ලංකාවේ කලාත්මක නිර්මාණ ජපානයට හඳුන්වා දීමටය. එහිදී ඔහු ජපානයේ ශ්‍රී ලංකා තානාපති අද්මිරාල් වසන්ත කරන්නාගොඩ මහතාට තිළිණයක් පිරිනමමින් මෙසේ කීවේය.

සර්ලා කරපු කැපකිරීම් හින්දා අද අපි නිදහසේ ජීවත් වෙනවා. මුළු රටම සර්ලට ණය ගැතියි. අපි පුංචි තිළිණයක් ගෙනාවා. ඒක සර් බාර ගන්නම  ඕනෑ. බුද්ධික සිරන්ත කීවේය.

තිළිණයට වඩා මිනිසුන්ගේ මේ කෘතවේදීත්වය මට වටිනවා අද්මිරාල් වසන්ත කරන්නාගොඩ මහතා කීවේය.

ජපානයේ ඉන්න අපේ ශ්‍රී ලාංකිකයෝද විවිධාකාර හපන්නු වෙති. උදය අතුකෝරල ඉන් එක් අයෙකි. ඔහු අපූරු නිර්මාණයක් කර තිබේ. ඒ, තැඹිලි වතුර බෝතල් කිරීමය. ”ඇරැයුම” තේමාව යටතේ පිහිටුවා ඇති වුට්විල් ටේ‍්‍රඩින් සමාගමේ සභාපතිවරයා වන උදය අතුකෝරාල, මොරටුව වේල්ස් කුමාර විදුහලේ ආදි ශිෂ්‍යයෙකි.

ජපානයට ආපු දවසේ ඉඳලම මම හිතුවේ අලූත් දෙයක් කරන්න  ඕනෑ කියලයි. මම දැන් ජපානයට ඇවිත් අවුරුදු හතක් අටක් වෙනවා. හැබැයි ඒ අලූත් දේ කිරීමේ වාතාවරණය හැදුනේ අපේ වසන්ත කරන්නාගොඩ තානාපතිතුමා ආවට පස්සෙයි. එතුමා ශ්‍රී ලාංකිකයන් සියලූ දෙනා එකමුතු කළා. රට ගැන හිතලා වැඩ කරන්න  ඕනෑ කියන අදහස අපේ ඔළුවට දැම්මා. ඒ අනුව මම හිතුවා ලංකාවේ සම්පත්වලින් අපි ප‍්‍රයෝජන ගන්න  ඕනෑ කියලා. ඒ අනුව තැඹිලි ගෙඩියේ වතුර මම බෝතල් කළා. මේ අලූත් නිෂ්පාදනය ”ජපානයේ ශ්‍රී ලංකා දිනය” උත්සවය වෙනුවෙන්මයි කළේ. ලංකාවේ  ඕනෑතරම් තැඹිලි තියෙනවා. මේක හොඳ ව්‍යාපාරයක්. අපේ රටට විදේශ විනිමය ලබන්න හොඳ අවස්ථාවක් කියලා මම හිතනවා. මේ තැඹිලි බෝතලය බොහෝම විද්‍යානුකූලවයි නිෂ්පාදනය කළේ. මිලත් අඩුයි. අවුරුද්දක් කල් තියාගන්නත් පුළුවන්. උදය අතුකෝරල කීවේය.

ජපන් සංචාරයේ තවත් කතා ලබන සතියට...

සටහන - ප‍්‍රසන්න සංජීව තෙන්නකෝන් / සේයාරූ  සාගර ලක්මාල් ද මැල්

බුද්ධික හිරන්තගෙන් තිළිණයක්...